UNIMAS enggau Resonics Consultancy begulai ngemansangka ‘Bandar Pintar’
KUCHING: U n i v e r - siti Malaysia Sarawak (UNIMAS)mujur nyain sempekat pemereti ati (MoU) begulai enggau Resonics Consultancy, ti bekerejasama ngemansangka ‘Bandar Pintar’ enggau ‘Revolusi Industri 4.0’.
Atur pengawa nyain MoU nya kemari, bela digulu sereta dikemataka Menteri Besai Datuk Seri Najib Tun Razak beserimbai enggau ‘ Forum Ekonomi Islam Sedunya’(WIEF) Ke-13 di Palan Konvensyen Borneo Kuching ditu, kemari.
Sama bisi enggau ngulu atur pengawa nya, Sapit Kepala Menteri Datuk Amar Awang Tengah Ali Hasan enggau chairman Yayasan WIEF Tun Musa Hitam.
Pemendar kerejasama ‘Bandar Pintar’ enggau ‘Revolusi Industri 4.0’ siti ari pengawa ke majak digaga entara industri enggau universiti di Sarawak setipak enggau peneka perintah nguing ngagai ekonomi digital.
Ngaga transformesyen ekonomi digital tu betuju ngenyampatka perambu pemansang kelebih agi nengah pengawa ngena perengka guna teknologi kelimpah ari ngenegapka kaul servis internet kelebih agi di Sarawak.
“UNIMAS deka majakka pengawa sida iya nambah mayuh agi industri, komuniti sereta kelebih agi rayat Sarawak sama enggau ngaga pansik sereta pemansang dalam Bandar Pintar enggau Industri 4.0 tu.
“Kelebih agi nengah per- engka guna sereta infrastruktur ICT ke deka di kemansangka di Sarawak,” ku Mandal Canselor UNIMAS Prof Datuk Dr Mohamad Kadim Suaidi madah nengah surat ke disalin ulih surat berita ditu, kemari.
Ba lansa nya mega, iya madah UNIMAS udah ngelala sekeda kluster dalam inisiatif program transformesyen ekonomi digital, ngambika ulih bekerejasama enggau universiti sereta industri.
“Nyengkaum pansik dalam pemansang di dalam Pengawa Betanam Betupi Pintar, Pengawa Kilang Pintar sereta Komuniti Pintar, kelebih agi di Sarawak,” ku iya.
Resonics Consultancy mega bisi nyain dua iti agi MoU, iya nya enggau FinTech4Good LLC enggau Umadx Online ( Malaysia) Sdn Bhd.
Pemerat Resonics, iya nya deka ngaga Sarawak kelebih agi Kuching ulih nyadi palan pemansang teknologi sereta pengawa dagang di menua tu.
Kelimpah ari Resonics Consultancy, UNIMAS mega bisi nyain MoU begulai enggau Koperasi Pro Belia Inovatif Sarawak Berhad (KOBIS), ngambika ulih ngenegapka agi kerejasama entara kededua piak ba pengawa numbuhka program ke deka meri pengelantang pendiau ngagai semua.
Atur pengawa betukar MoU nya kemari, dipunka ulih chairman KOBIS Zaiwin Kassim ke ngarika KOBIS, lalu UiTM diwakil ulih Kadim.