Malaysia setuju muka mayuh agi CLC
KUCHING: Malaysia setuju muka mayuh agi sekula CLC (Palan Belajar Komuniti tauka) di menua tu, kelebih agi di Sarawak atas peminta Perintah Indonesia, alai anak pengereja pengawa ari Indonesia ke gawa di Sarawak besekula.
Menteri Besai, Datuk Seri Mohd Najib Tun Razak madahka Malaysia setuju muka mayuh agi CLC, berindik ari peminta Indonesia laban naka ke diatu semina bisi 68 buah di Sabah lalu 10 buah di Sarawak.
“Nitihka prinsip nya, Malaysia setuju CLC ditambah di Sabah enggau Sarawak, lalu diatu kitai nganti perambu nya digaga enggau silik agi ari Indonesia,” ku Mohd Najib.
Iya madah munyi maya aum media ba atur pengawa ‘Rundingan Tahunan ke-12 Malaysia-Indonesia’ beserimbai enggau ngerami 60 Kaul Diplomatik entara Malaysia-Indonesia di Hotel Hilton ditu, kemari.
Aum media nya mega digaga beserimbai enggau penemuai Presiden Republik Indonesia, Jokowi Widodo ke Kuching kemari.
Ba timbal Jokowi bekaul enggau CLC tu, iya madahka Indonesia beterima kasih enggau pemerat Malaysia ba CLC di menua tu.
“Pekara ke berat bekaul enggau CLC, palan beguna amat ba rayat Indonesia ke diau sereta gawa di Malaysia, laban nya hak pelajar anak pengereja pengawa Indonesia, lalu aku minta ari PM (Menteri Besai) Najib ngemeratka pekara sereta ngarapka kitai sama nyukung nambahka CLC di Semenanjung tauka di Sarawak,” ku Jokowi,ti keterubah endar nemuai ke Kuching, seraya ma dahka diri berasai temegah ati meda Mengeri Besai Kuching ke beresi sereta manah endar.
Dipelaba (nitihka statistik ari Opis Konsul Jenderal Republik Indonesia di Kuching), urung 2,500 iku nembiak Indonesia ke enggau apai indai sida di Sarawak, besekula ba CLC.
Kelimpah ari nya,( ari Opis Konsul Jeneral republik Indonesia Kuching ke sebedau tu),madahka sida pan mayuh nerima peminta ari kompeni kebun bedandang besai di Sarawak ke minta muka mayuh agi CLC ditu.
Tang Perintah menua nya semina berunding deka ngaga sebuah palan CLC ke besai agi, ngambika bala nembiak Indonesia ari kebun bukai ulih digempung begulai ba siti endur enggau nembiak ari kebun bukai ke mayuh agi, laban beratika sekeda kebun bedandang besai, anak sida kurang ari 10 iku.