1,633 KIR Sarawak deka dibantu nengah program 1AZAM
KUCHING: Juluk Opis Menteri Pengintu Pengelantang Pendiau, Raban Bansa, Orang Indu enggau Pemansang Nembiak deka mantu 1,633 Ketuai Ruang Bilik (KIR) di Sarawak nengah program 1AZAM (Akhiri Zaman Miskin), ba taun 2018.
Menteri opis nya, Dato Sri Fatimah Abdullah madahka KIR nya deka dibantu nengah ungkup belanja ke diagih taun baru ari perintah besai.
“Baka ke udah ditemu kitai, Perintah Besai udah ngemendarka ungkup belanja sepenyampau RM10 juta ngagai perintah nengeri ari baruh program LIH (Low Income Household) iya nya 1AZAM ba taun 2018.
“Juluk opis menteri aku deka mantu 1,633 KIR baru, ti deka nerima penguntung nengah bantu 1AZAM ngena ungkup belanja ke deka diterima kitai taun baru.
“Kebuah kitai ke agi diberi ungkup belanja tu laban kitai ngayanka penyulut sereta penyampau orang dibantu tauka orang seranta agi mayuh di Sarawak,” ku iya dalam aum pengarang berita.
Dulu ari nya Fatimah nyadi chairperson Aum Focus Group Munaska Penyeranta Nengeri Sarawak Bil.5/2017 ke diatur ba Ringkat 2 Wisma Bapa Malaysia ditu, lemai ensanus.
Berebak enggau tu Fatimah madahka pengaga ati diri laban ke udah mujur mantu semua rintai nama Lock Figure Belum Terima Bantuan ( BTB 2016) Langsung Sarawak @01.01.2017 ke bai 419 KIR.
“Siti agi berita manah kitai iya nya, nyentuk 15.11.2017, status BTB Langsung Negeri Sarawak ke bisi 418 KIR udah mujur dikusungka,” ku iya.
Kelimpah ari nya Fatimah madahka Status Penyeranta Ke Diatu Dalam Sistem E-Kasih Nengeri Sarawak naka 15 November 2017 bisi 117,070 KIR.
Penyampau nya ku iya dibagi ngagai ‘Miskin Tegar’ (MT) ke teulihka penatai pemisi tauka ba tikas garis penyeranta (PGK) iya nya RM660 enggau raban seranta (M) teulihka RM990 sebulan.
“Ba taun 2016 naka bulan November kitai bisi 28,213 KIR dalam MT sereta bisi ngayanka pemanah ba taun 2017 iya nya ngerikod 20,665 KIR MT dalam timpuh ke sama.
“Penyampau MT ba taun 2017 bisi 26.8 peratus lebih baruh dibandingka enggau taun ke sebedau nya (2016).
“Lalu penyampau raban seranta (M) dalam sistem e-Kasih ba taun 2016 naka bulan November bisi 36,919 KIR dibandingka enggau timpuh ke sama ba taun 2017 bisi 39,385 KIR,” ku iya.
Kelimpah ari nya Fatimah mega bisi ngenang pasal penyampau KIR ke pansut ari garis penyeranta ketegal teulihka penatai pemisi lebih ari RM990 sebulan.
Penyampau KIR ke pansut ari garis penyeranta naka bulan November 2017 bisi 57,020 ari penyampau 117,070 KIR berejista dalam e-kasih 2017.
Lalu ba taun 2016 naka bulan November, bisi 42,933 KIR pansut ari garis penyeranta ari 113,510 KIR ti direjista dalam sistem e-Kasih.
Lebuh ke ngenang aum nya kemari, Fatimah madahka semua ke datai bisi mending pejurai ari Opis Pemansang Perintah Besai Nengeri Sarawak, Opis Menteri pengintu Pengelantang Pendiau, Raban Bansa, Orang Indu enggau Pemansang Nembiak Mit sereta pejurai pasal penyeranta mengeri ari Opis Menteri Kandang Menua enggau Pengawa Berumah sereta penyeranta menua pesisir ari Opis Menteri Betanam betupi Moden, Tanah adat enggau Pemansang Kandang Mengeri.