500 iku pesereta ngulu Latih Ngatur Penusah Ngenyit Nengeri S’wak
KUCHING: Urung 500 iku pesereta udah ngemujurka latih napi penusah ampuh bah dikena nyediaka diri napi pangka kedua ampuh bah ti disadang deka nyadi dalam bulan November enggau Disember taun tu.
Latih enggau Simulasyen Ngatur Bantu Penusah Ngenyit Renggat Nengeri Sarawak udah diatur di Balai Dr Johnical Rayong Ngipa di Skrang ti nyadi palan ngenduh enda lama raban tasah lebuh ampuh bah, ti diatur begulai Opis Pengintu Pengelantang Komuniti (JKM) Nengeri Sarawak enggau ejensi perintah bekaul.
Program latih tu dipenyadika Menteri Muda Industri enggau Beranakka Puku, Malcom Mussen Lamoh ti ngarika Sapit Kepala Menteri, Datuk Amar Douglas Uggah Embas, madahka latih nya beguna endar dikena nyediaka diri napi penusah ampuh bah ti disadang deka mangka nengeri tu ba sebarang maya.
“Kitai enda ulih ngadang kemaya penusah ngenyit nyadi tau nyadi tang dikena kitai ngurangka pangka iya, pansik patut dipejalai seraya nyediaka diri ngambika rayat enda deka napi penusah ti berat,” ku iya.
Pia mega ku Kaban Kunsil Nengeri (ADUN) Batang Ai nya nambah, pengawa milih Balai Dr Johnical Rayong nyadi palan ngenduh sida ke tasah bah engkeman endar laban ba tengah-tengah kandang menua ti suah dituntung penusah bah.
“Aku mega bisi dipadahka bakih aku, Dr Rayong, ke alai balai tu kala nyadi palan ngenduh sida ke tasah bah dalam bulan September nyin tadi ti ngaul peranak Rumah Lembu ari Entalun, Ulu Skrang,” ku iya seraya ngarapka mayuh agi perengka guna ulih disedia ejensi bekaul di balai nya pulaika pengelantang sida ti tasah bah ila.
Berebak enggau nya, batang tuju simulasyen nya dikena ngenegapka kerejasama strategik JKMS enggau semua raban kelebih agi Komiti Mutarka Penusah Ngenyit Bagi Menua enggau Pelilih, ejensi ti nyelamat sida ke tasah, ejensi nyediaka servis perubah, pemeresi, perengka guna mensia mayuh, matau pejalai trafik enggau kaunseling ti bisi di palan ngenduh sida tasah bah.
Pengawa tu mega nentuka semua raban ti ngaul diri dalam latih ngasaika peneleba ba penyikar gawa sereta seruran nyikap diri napi penusah ti enda disadang nyadi.
“Tu mega meri Komiti Pengatur Palan Ngenduh enggau Komuniti ngambika mereti agi sereta sedarka pekara pasal pangku pengawa enggau tanggungpengawa sdia sereta kerejasama rat enggau Komiti Pengatur Pekara Penusah Ngenyit Pelilih, Bagi Menua enggau Nengeri ti diketuaika Uggah, nyadi chairman iya,” ku iya.
Sama bisi datai ba pengawa bejadika Simulasyen Sida Tasah Bah iya nya Kaban Parlimen ( MP) Lubuk Antu, Datuk William Nyalau Badak, ADUN Engkilili Dr Johnical Rayong Ngipa, Direktor JKMS Abang Shamsudin Abang Seruji, Sapit Ketuai Sekretari (Strategik) KPWKM Azman Mohd Yusof, Sapit Ketuai Pulan Operasyen JKM Zulkifli Ismail, Pemesai Pelilih Lubuk Antu Richard Ngumbang, SAO Brin Munsang, pengari JKR Sri Aman Bujang Kanang, bala pengari ejensi perintah, penghulu, kaunsilor, kapitan sereta tuai rumah enggau pesereta simulasyen ke bukai.