Perintah enda ngelaungka sekula ti bepelasarka jalai pengarap Projek ngangkatmanah sekula lama ke dipejalai di serata nengeri tu mega isi nyengkaum sekula ti bepelasarka jalai pengarap: Uggah
KUCHING: Pemesai guna sekula ti bepelasarka jalai pengarap ( mubaligh) di nengeri tu endang enda dikelaungka perintah, seraya ngenukuka tanggungpengawa sekula nya nempa modal mensia bepelajar sereta bisi kualiti.
Berindik ari nya, Sapit Kepala Menteri Datuk Amar Douglas Uggah Embas madahka, maya perintah ngemeratka pengawa ngemanahka sekula perintah ke lama di serata nengeri, semua sekula mubaligh mega enda dikelaung ari nerima bantu nya.
“Mayuh sekula mubaligh di Sarawak ti begunaka program ngangkatmanah. Nya kebuah bisi peminta ngambika kitai berandau enggau perintah besai enggau perintah nengeri ngulihka belanja dikena mantu sekula mubaligh tu,” ku iya.
Iya mansutka pekara nya lebuhka dirandau pengudah nyuaka geran ngagai Tadika St. Faith, Gerija St. Margaret, Borneo Evangelical Mission, Gerija Roman Katolik enggau Serakup Gerija-Gerija Sarawak di Tadika St. Faith, ditu, kemari.
Sama bisi datai Biskop Anglikan, Revd. Danald Jute enggau Vikar Gerija St. Faith, Nelson Ugas Bulang.
Nitih ku Uggah, geran penyampau RM1.97 juta nya ari perintah nengeri enggau perintah besai nengah Unit Ungkup Pengarap Bukai (UNIFOR).
Berindik ari nya, iya ke mega nyadi menteri megai tanggungpengawa ba UNIFOR ngarapka enggau bantu nya, rayat deka terang agi meda pengawa UNIFOR ti ngayanka polisi begulai perintah.
“Tu sebagi ari tuju pengawa numbuhka UNIFOR dikena nentuka isu jalai pengarap diputar memanah seraya ngetanka pengelantang raban bansa enggau jalai pengarap di Sarawak,” ku iya.
Ba lansa ke bukai, ku Nelson, geran sepenyampau RM400,000 ti diberi ngagai Tadika St. Faith udah mantu ngelempungka tating belanja raban sida melanja ungkus ngaga begunan tadika nya, ti manggai RM4.2 juta.
“Pemeri perintah tu mai reti chukup besai ngagai kami terus nyediaka palan belajar ti bisi kualiti ngagai bala anak kitai,” ku iya.
Begunan Tadika St. Faith ti udah tembu pengudah berengkah digaga dalam taun 2015 di taba 2 ikar pemesai, diatu ulih nerima urung 300 iku nembiak di 11 bilik kelas, 24 iku pengajar enggau dua staf am, kelimpah sebuah opis pengajar enggau bilik komputer.
Mayuh sekula mubaligh di Sarawak ti begunaka program ngangkatmanah. Nya kebuah bisi peminta ngambika kitai berandau enggau perintah besai enggau perintah nengeri ngulihka belanja dikena mantu sekula mubaligh tu. Datuk Amar Douglas Uggah Embas Sapit Kepala Menteri