ASADIA ngintu pengerami empat taun udah ditumbuh kena 25 Nov

KUCHING: Akademi Serakup Dayak Iban Sarawak (ASADIA) deka ngintu empat taun udah ditumbuhka kena 25 November tu ba Christian Ecuminical Worship Centre ditu.

Nitih ku ketuai Asadia Mabong Unggang, madahka nyerumba pengerami ngintu empat taun ditumbuh, Asadia mega ngatur pengawa nyuaka setipikit ngagai urung 80 iku orang ke masuk kelas belajar main asal diatur akademi nya semanjai taun 2017.

Ba taun 2017 urung 80 iku ke belajar main asal baka kuntau, sape, ajat Bidayuh enggau ke bukai ke belajar ba indu opis Sadia, RPR Landeh enggau palan bebeli barang ba Siburan.

“Kami ( ASADIA) deka ngintu pengerami empat taun udah ditumbuhka, lalu dipelabaka temuai pemadu dipebasa datai malam nya ila Datuk Joseph Entulu, Menteri ba Opis Menteri Besai.

“Kenyau ari ditumbuh tauka belabuh ari taun 2013, Asadia udah ngelatih urung 850 iku pesereta ti nyengkaum bansa Dayak bukai kelimpah ari bansa kitai Iban,” ku iya madah ngagai Utusan Borneo.

Sebarang tanya bekaul enggau pengerami nya tau ditanya ngagai Mabong empu ba lumur 0126925562.

Berebak enggau tu Mabong ngarapka mensia mayuh terus nyukung pengawa ngetanka main asal bansa baka nengah kelas belajarka main asal ti bisi disediaka Asadia.

“Aku ngarapka kitai bansa enda leju nyukung Asadia meri pengelandik enggau penemu main asal ngagai bansa kitai.

“Enti kitai leju, main asal kitai tentu deka punas baka main asal main musik Engkerurai, belikan enggau ruding.

“Pengelenyau main asal kitai mega ngasuh bansa kitai ke rebak dudi ngasaika kediri nadai identiti bansa,” ku Mabong.