Gaji, elawin ditiki atur ke chukup engkeman Elawin ditiki RM100 sebulan nya deka mantu ngelempungka pengidup ketuai raban bansa

SIBU: Atur perintah nengeri nikika gaji enggau elawin ketuai raban bansa dipeda chukup engkeman.

Pemancha Pelilih Sibu, Pemancha James Semilan madah, atur nya engkeman amat laban udah lama dianti.

“Terima kasih ngagai perintah nengeri laban udah nikika gaji enggau elawin ketuai raban bansa ba nengeri tu.

“Enggau penyampau niki RM100 sebulan, iya deka mantu ngelempungka ungkus pengidup ditapi ketuai raban bansa,” ku iya maya dirandau pemberita, kemari.

Nitihku James, tanggungpengawa dikereja ketuai raban bansa ke maya hari tu udah mungkur pengawa ke besai.

“Nyema suba, pengawa sida semina bekaul enggau peranak rumah panjai diri, tang diatu sida bejalaika tanggungpengawa ke lebih besai.

“Sehari tu, ketuai raban bansa patut ngulu licha enggau kus ke bisi diatur perin- tah, mantu nembiak redak ba pekara bekaul enggau opis sereta utai bukai.

“Tu begunaka sida nurun ke mengeri sampai dua tiga kali seminggu. Nikika elawin RM100 sebulan nya enti diperati enda ngipak enggau pemerat tanggungpengawa ke dipegai,” ku iya.

Kena Hari Lima minggu ke udah, Sapit Kepala Menteri Datuk Amar Douglas Uggah Embas madah, nikika elawin RM100 nya betuju dikena meri basa ngagai pengawa ke digaga bala ketuai raban bansa ba nengeri tu.

Reti nya, gaji temenggong, pemancha enggau penghulu deka niki RM100 udah nya tuai rumah niki ari RM800 nyadi RM900 bepun taun baru.

James madah, semua bela nemu ungkus pengidup kemaya hari tu majak niki ketegal pangka ekonomi ke nadai tentu.

“Kitai sigi ngelaluka gaji enggau elawin tu ditiki taja enda mayuh. Tang iya tetap mih meri pemaik ngagai kitai,” ku iya.

Terima kasih ngagai perintah nengeri laban udah nikika gaji enggau elawin ketuai raban bansa ba nengeri tu. Pemancha James Semilan