Berebak enggau nya, sempekat BCA enggau BTA patut digaga lengkas dikena ngemujurka juluk tu
KUCHING: Malaysia enggau Indonesia sepenemu adan menua ba Tebedu (Sarawak, Malaysia) enggau Entikong (Kalimantan Barat) deka dibuka baru, enti dua sempekat mujur disain enda lama agi.
Menteri Besai Datuk Seri Najib Tun Razak madah adan menua Tebedu- Entikong deka dibuka baru pengudah Sempekat ‘Border Crossing Agreement’ (BCA) enggau Sempekat ‘Border Trade Agreement’ (BTA) digaga baru sereta disain kededua buah menua tu.
“Enti nitihka penemu kami, Presiden Indonesia Joko Widodo (Jokowi) enggau aku empu udah setuju adan menua di Tebedu-Entikong dibuka baru pengudah BCA enggau BTA nya disain.
“Kami ngarapka pekara tu ulih digaga jampat laban lebuh garis menua tu dibuka, iya deka meri penguntung kelebih agi ngagai komuniti ke diau besemak enggau kededua garis menua nya,” ku iya.
Iya madah munyi nya ba aum media begulai enggau Jokowi pengudah nyadi saksi atur betukar Sempekat Pemereti Ati (MoU) ba Kerejasama Dalam Pekara bekait enggau Pelajar tinggi Islam entara kededua buah menua (Malaysia-Indonesia) ba atur pengawa ‘Rundingan Tahunan ke- 12 Malaysia- Indonesia’ beserimbai enggau Ulangtaun ke-60 Kaul Diplomatik entara Malaysia-Indonesia, di Hotel Hilton ditu, kemari.
Najib madahka, peminta ke sebaka mega bisi di pinta di garis menua Sabah enggau enggau Kalimantan, ke mungkur pekara ke sebaka bekait enggau BCA enggau BTA.
Ba lansa bukai, Najib mega madahka Malaysia besetuju pansik digaga ulih kededua buah menua tu bekait enggau peluang ke ulih digaga ba garis menua kededua buah menua.
“Pemansang tu ulih digaga ba garis menua ngambika meri penguntung ngagai Malaysia enggau Indonesia, ke bisi bekait enggau pengawa betanam betupi besai kelimpah ari pengawadagang PKS (Mit, enggau Umbas iya) ulih dikemnsangka,” ku iya.
Kelimpah ari nya mega, Najib meri terima kasih ngagai Perintah Indonesia sereta presiden sida iya laban betatika penanggul sebun, alai Indonesia ku iya, ngemeratka pekara nya.
“Taun tu, udah dua taun Malaysia nadai napi penanggul jerebu lalu pekara tu ngelantangka ati semua rayat Malaysia kelebih agi di Sarawak.
“Aku deka meri terima kasih ngagai Presiden sereta Perintah Indonesia laban dua taun Malaysia nadai napi sebun lalu terima kasih mega laban betatika penanggul tu,” ku iya.
Kami ngarapka pekara tu ulih digaga jampat laban lebuh garis menua tu dibuka, iya deka meri penguntung kelebih agi ngagai komuniti ke diau besemak enggau kededua garis menua nya. Datuk Seri Najib Tun Razak Menteri Besai Malaysia