SUPP Lanang majak ransing ngamatka semaya ungkup peranak rumah panjai
SIBU: Parti Sa’ati Rayat Sarawak (SUPP) terus ransing ngamatka danji sida ungkup peranak rumah panjai enggau sekula-sekula ba sitak Parlimen Lanang.
Sempekat nya digaga maya raban komiti SUPP/ Barisan Nasional (BN) P211 Lanang nemuai ke rumah panjai enggau sekula apin lama ke udah beserimbai enggau program ke diatur sida.
“Tim SUPP/ BN P211 Lanang ngamatka sempekat deka ngurangka tating belanja peranak ba sitak menua pesisir pengudah penemuai lalu nyuaka pemeri naka ulih nitihka pengulih diri naka tu,” ku siku chalun bepenau SUPP ungkup penuduk Parlimen Lanang Kelvin Kong ditu, ensanus.
Ku iya, nengah pemeri nya dikearap chalun SUPP/BN ulih meri sukung enggau peransang ari rayat ngambi ulih menang penuduk P211 Lanang maya Pengawa Bepilih Besai Ke-14 (PRU14) ke dipelaba diatur ba penggal keterubah taun 2018.
“Nyema kitai mujur ngambi baru penuduk Parlimen Lanang nyadi kami deka meri saup penuh ba semua pekara pemansang enggau ngubah sitak menua pesisir nyengkaum ngaduka perengka guna, jalai raya, lampu, bekal karang enggau ai, telekomunikasyen, pengerai, pendiau sekula enggau ke bukai.
Kelimpah pemeri ke dikumbai ‘ Touch Point Fund’ ke diterima sekeda rumah panjai enggau sekula, nyengkaum meri perengka sistem muzik (PA & karaoke set) ke disua ngagai Rumah Lyn Banyih, Rumah Steve Chaong, Rumah Pop Chendang enggau Rumah Setia Ulek ba sitak Sungai Naman enggau Durin.
Ku iya, nama utai dikearap deka dikeamatka BN lalu nya mega nyengkaum pemeri ukai semina mantu tang mega ngurangka tating belanja rayat di menua pesisir.
Iya mega meri jamin deka mayuh agi bantu ari sukut pemansang ungkup sitak menua pesisir diberi BN nyema ulih menang ba penuduk Parlimen Lanang maya PRU14 ke deka datai.
Nerang silik pasal ‘Touch Point Fund’, iya madah, nya endang belanja ke pemadik peranak rumah panjai iya nya ngemanahka anak jalai, jelatung, lurung jalai kaki, lampu, kipas enggau mayuh agi ke bukai nengah cara beripai.
“Kitai ngaraoka pemeri tu meri pemaik ngagai peranak rumah panjai ba sitak Parlimen Lanang dikena mantu sida neruska pengidup niting hari,” ku tandu iya.
Nangkan nya, kelvin minta sukung penuh enggau bantu ari peranak menua pesisir lebih agi bansa Iban ngambi ulih mai ubah pemansang ungkup rumah panjai sida.
“Raban komiti SUPP Lanang begulai enggau komponen partiparti BN ke bukai udah sedia bekerjasama enggau semua lapis komuniti enda ngira ba mengeri tauka menua pesisir lalu naka ulih ngambi baru penuduk Parlimen Lanang,” ku iya.