Meri empas besai ba ekonomi, peluang gawa sereta asil eksport

KUCHING: Atur Dagang Mit enggau Jelan Pemesai (SME) meri empas besai ba pekara ekonomi, peluang gawa sereta asil ekspot nengeri, ku Sapit Kepala Menteri Datuk Amar Awang Tengah Ali Hassan.

Berindik enggau nya, iya ngelalau tetiap ejensi perintah ke bisi kaul meseti beratka pemansang SME.

“Perundingka chara kitai ulih ngangkatka SME bepelasarka ekonomi digital.

“Aku pechaya ekonomi digital sebengkah chara ke strategik endur kitai ngangkatka pengulih sereta kapasiti dagang SME di Sarawak.

“Tu mega sebengkah chara ti ulih ngemesai makit produk SME,’ku iya lebuh ke ngulu Aum Komiti Pemansang Pengawa Dagang Nengeri Sarawak(SEDCC) ke diatur di sebuahah hotel ditu, kemari.

Awang Tengah ke mega Menteri Industri enggau Pemansang Pengawa Dagang nambah perintah nengeri bisi ngagihka belanja

Aku pechaya ekonomi digital sebengkah chara ke strategik endur kitai ngangkatka pengulih sereta kapasiti dagang SME di Sarawak. Datuk Amar Awang Tengah Ali Hassan Sapit Kepala Menteri Sarawak

dikena numbuhka palan ngumpul ba sekeda pelilih menua.

Palan nya ku iya, deka mantu raban orang bekebun nyual asil sida kelimpah ke nyadi palan ungkup orang SME begigaka dagang baru.

Nitihka penerang Awang Tengah, tiga iti palan ngumpul iya nya seiti di kandang utara Sarawak, siti ba tengah Sarawak(Tanjung Manis) enggau siti di selatan iya nya di Samarahan deka ditumbuh.

Ngenang kaul ke sama, iya madah Bajet 2018 ke dibantai Menteri Besai nyendia mayuh insentif ngagai SME.

“Ketegal nya SME meseti dikemerat ngambika ulih nyaup program pemansang menua ke alai penyampau dagang SME pan chukup mayuh,’ku iya.

Di Sarawak ku Awang Tengah, penyampau SME nambah 39.2 peratus kenyau ari taun 2016 iya nya ari 43, 830 nyentuk 61,036.

‘Perintah nengah Pelin Besai Pemansang SME nagit SME ulih ngenataika 41 peratus ngagai GDP menua manggai ba taun 2020.

“Ari sukut nyendia pengawa puang , SME ba taun 2016 udah nyapai 65.3 peratus lalu ngelui ari tagit 62 peratus.

“Kelimpah ari nya, kitai nagit SME ulih mai asil ekspot ba ikas 25 peratus manggai ba taun 2020,’ku iya.