E&E Happines Cafe deka ngatur Pengerami Mantar Krismas kena 2 Disember 2017

KUCHING: Siti pengerami Mantar Krismas deka diatur ba E & E Happiness Cafe Lot 7, Tabuan Tranquality Commercial Centre 3, Jalai Canna Kuching kena 2hb. Disember 2017 (Hari Enam).

Entara pengerami ti deka diatur nya beperindang enggau siku artis baru, Sakura Diana Dawi ari Ranyai Studio Kuching. Malam nya iya deka mai lagu popular maya ke diatu enggau dua iti single baru iya ‘Tua Aja’ enggau ‘Mulut Pulut Ati Keladi’.

Siti ari tuju pengerami nya laban dikena nyambut enggau ngingatka penatai musim Krismas seraya ngedutka kaul enggau pangan diri. Kelimpah ari nya, pengerami nya mega endur kitai mantai sereta ngelakuka ai tuak enggau pemakai asal kitai Iban.

Aktiviti bukai ti deka diatur nya pekit ngirup ai tuak ngena straw, game enggau chabut tikit benasit. Mensia mayuh ke datai mega deka diberi peluang bekaraoke beperindang enggau pangan diri.

Dikena ngerichahka agi pengerami malam nya, DJ Mathew Abu dipaduka nyadi MC, l alu DJ Ivy mega udah madahka diri datai lalu disadang mai lagu baru iya ‘Menyati’.

Menijar chairman pengatur malam mantar Krismas E & E Happiness Cafe, Eliza Suntai madahka sida bisi nyendiaka menu ke nyenyamai baka pansuh, ikan, barbekiu enggau ke bukai. Semua pemakai maya nya ila diberi rega puku rata RM5 sepinggai.

Enggau nya, mensia mayuh datai mih sampal sama berami sereta beperindang enggau pangan pangan diri.

Penerang ke silik agi sentang pengerami mantar Krismas E & E Happiness Cafe tau ditanya ari Eliza Suntai, Elbson Marajan tauka Albinus Bundan ba nengah lumur 013-8455 155 / 082-503 434.