Tu deka ngemuntangka pedagang ‘inap desa’ lebih agi raban bansa Dayak ngelaku sereta bejualka produk sida
KUCHING: Sapit Kepala Menteri Datuk Amar Douglas Uggah Embas mujur bejadika laman web Kaunsil Dagang enggau Industri Dayak (DCCI) dikena ngemuntangka pedagang ‘inap desa’ ngelaku sereta bejualka produk sida.
Iya nyadaka sukung ngagai inisiatif DCCI ke udah ngemansangka laman web ‘Inap Desa Dayak di Sarawak’, lalu ngasaika nya seriris enggau agenda ekonomi digital perintah negeri.
“Ekonomi digital sigi juluk pemansang nengeri tu dudi hari nengah iring Kepala Menteri Datuk Patinggi Abang Johari Tun Openg.
“Kami nemu pasal penge- rembai ke chukup jampat e-commerce nyadi sebengkah chara dagang baru ba dunya dagang kemaya hari tu,” ku iya.
Uggah madah nengah makit digital, dagang mit ulih rembus ngagai makit global, kelimpah ngerembaika ‘horizon’ dagang sida ngelui ari kandang menua diri lalu nya nadai ulih dikereja nengah chara konvensional ba pengawa dagang.
Uggah madah laman web nya ulih nyadi penatai ke chukup bekuasa dalam ngelakuka servis enggau produk nengah chara ‘online’, bisi mega pematut meretika dalam pasal juluk makit.
“Iya ke nyengala, juluk makit nengah penumbuh laman web tu deka nambahka agi untung tauka pinta ari penguna. Taja pia, kita deka jampat nemu iya nadai ngembuan reti enti kitai nadai beratika juluk ke diguna dikena nyapai pemutus ke dikeingin.
Sebengkah laman ke mujur, ku iya begunaka strategi makit ti ngasi ngerembaika pemayuh produk, servis, imej, video tauka fail bukai ke dikembuan.
Nya alai, ku iya tempa pendiau laman web patyt numpu ngagai juluk ke dikeingin disempulang enggau pekara bukai ke engkeman.
“Dikena ngasilka mayuh agi malin, kita patut numpu ngagai chara matak enggau mandangka penyelai main asal enggau rampa menua kelimpah pendiau pengidup pupu bansa ditu awakka iya deka dilawa temuai,”ku iya.
Dikena nambahka agi asil produk, iya madha beguna amat nentuka isi laman web nya berurun sereta dikerinduka penguna dikena ngemuntang orang nguga sereta ngemayuhka randau.
Uggah mega nangkan pedagang inap desa iya nya sida besemekih enggau padagang ari serata dunya, nya alai kitai patut lebih kreatif ngelakuka servis diri dikena matak temuai datai ngagai inap desa kita.
“KItai ngembuan mayuh utai ke manah di nengeri tu lalu nya nadai ba nengeri bukai,” ku iya seraya madah, sida patut nguna pemanah nya lalu ngarap inap desa deka nyadi sebengkah ari industri beguna ungkup Sarawak.
Iya madah perintah nengeri ngagihka RM1 bilion belanja ungkup infrastruktur digital ba nengeri tu lalu nambahka pengelaju internet, nyengkaum ba kandang menua ulu ba Sarawak ambika chunto baka di Mulu.
Nya, alai iya madah DCCI deka bulih penguntung ari program tu kelimpah mantaika langgur penemu ngagai perintah bekaul enggau sitak ke patut disambung enggau perengka internet ke laju.
Ku iya, temuai ke raun ngagai nengeri tu tentu mega deka meda telefon pintar ulih disambung enggau internet. — Bernama
Kami nemu pasal pengerembai ke chukup jampat e-commerce nyadi sebengkah chara dagang baru ba dunya dagang kemaya hari tu. Datuk Amar Douglas Uggah Embas Sapit Kepala Menteri Sarawak