Urung 3,000 raban BEM ngerami CFA 2017
MIRI: Tu pengaga diasai ngintu pengerami Krismas lebih ari 3,000 iku temuai ti ngulu ‘Christmas for All’ (CFA 2017) di Gerija Sidang Injil Borneo (BEM) di gerija On the Rock ditu, apin lama ke udah.
Diatur BEM On the Rock, pengerami dua hari berunggu mantar Krismas ninting taun berambaika jaku ‘O Come, Let Us Adore Him’ diserumba mayuh macham program ti ngerinduka ati enggau batang pengerami iya nya pengawa nerima penatai pengabang Krismas kena ngalihari Hari Minggu.
CFA ke-9 udah dipenyadika Sapit Speaker Aum Kunsil Nengeri (DUN) Datuk Gerawat Gala.
Gerawat mantaika pengaga diri meda pengerami seraya muji bala komuniti pengatur ba ‘ pemansang gerija’ ti mujur ngatur iya sereta ulih ngempung raban ari semua serak pengidup begempuru, kelebih agi rebak baru.
¡°Krismas ungkup semua orang, nyadi pelasar besai ngerembaika jaku injil juru selamat Jesus Kristus. Tu jalai ngagai kitai begulai enggau bala komuniti ti diau besemak enggau kitai seraya nerenakka pengelikun sereta begulai bebaik,” pia ku Kaban Kunsil Nengeri (ADUN) Mulu madah dalam jaku bejadika pengerami nya.
Gerawat bekunsi ke alai taun tu perintah nengeri udah ngagihka RM15 juta ungkup pengawa numbuhka Unit Jalai Pengarap Bukai (Unifor) ke baru dikena mantu mayuh bengkah gempung jalai pengarap ukai Islam di serata nengeri ba pekara belanja ngaga begunan tauka ngemanah.
Peminta ari BEM On the Rock nyengkaum begunan pra-sekula gerija deka dibai ngagai Unifor enda lama da agi, ku iya.
¡°Projek pra-sekula nyadi pengawa ti beguna endar laban kitai dekaka pelajar enggau pengawa ngintu pengelantang bala nembiak kitai dikemerat ba kededua pekara perengka guna enggau pemanah ulah. Langgur belanja ngemanahka pra-sekula di ringkat baruh begunan tu urung RM70,000 ngagai RM80,000.
¡°Aku mega deka mantu pengawa tu enggau ngagihka geran Projek Mit Pemansang Menua Pesisir (MRP) sepen- yampau RM35,000,” ku iya nambah.
Gerawat mega madahka Kaunsil Mengeri Besai Miri deka nampung pengawa ngatur Pejalai Bebala Mayuh Krismas Mengeri Miri dalam bulan baru, udah ditukuka Datuk Bandaraya Miri, Adam Yii.
Ba lansa ke bukai, Pastor Kanan BEM On the Rock, Pastor Andy Anyi, madah pengerami nya nyediaka peluang ngagai bala kaban gerija ditu ngintu pengerami begulai sebedau kemisi sekula berengkah ke alai sida deka mulaika diri ngagai menua sida empu.
¡°Iya dikearap deka negutka pemanah tanggam kaul antara bala anak Tujan sereta peranak Miri lalu ngemai pengelantang enggau basa bala komuniti kitai begulai baka diri sebilik,” ku iya.
Berebak enggau pengerami nya, Pastor Andy mega bisi nyuaka pemeri ba bantu belanja ari gerija ngagai Miri Association of Parents with Special Children (Pibakis).
Entara aktiviti bukai ke bisi diatur nyerumba dua hari berunggu pengerami nya nyengkaum konsert Krismas enggau mayuh bansa tanda, belakun enggau belagu, ngerichahka agi semangat deka kemisi hari besai.
Chairman Pibakis Miri, Yeao Kian Yong, Chairman Sayap Nembiak Parti Pesaka Bumiputera Bersatu (PBB) Telang Usan, Kaunsilor Dominic Nyurang sereta bala bukai ti ukai kaban gerija ke bukai antara sida ke bisi datai.