Mayuh peluang disedia perintah mantu orang indu nambah penatai pemisi
MALUDAM: Raban orang indu ke bisi ngembuan pengelandik ba mayuh bidang baka ngaga produk kraf jari, bedagang, fesyen, ngemas diri enggau nganta diperansang ngerebut peluang ke bisi disedia piak perintah.
Chairman Kaunsil Pemansang Indu enggau Ruang Bilik ( MPWK) Parlimen Batang Lupar, Zuraida Julai madah, peluang ungkuo raban orang indu nambahka penatai pemisi diri enggau ruang bilik sida diatu chukup mayuh laban peluang nya endang udah disediaka piak perintah.
Nya alai, iya madah perintah seruran meri peluang ngagai orang indu tu ke datai ari menua pesisir masuk mayuh bengkah bidang ke bisi disediaka perintah dikena nambahka penatai pemisi ruang bilik sida.
Iya madah munyi nya rambau Pengerami Nempa Kaul Gempung Indu diatur Kaunsil Pemansang Orang Indu enggau Ruang Bilik ( MPWK) Parlimen Batang Lupar bepalan ba Dewan Masyarakat, Kampung Spinang Maludam ditu, ensanus.
Dulu ari nya, pengawa nutup pengerami nya dipenyadika Pemesai Opis Kunsil Sarawak ba Opis Kaunsil Pelilih Maludam, Noraini Edi ti ngarika Sekretari Politik ngagai Menteri Pemansang Orang Indu, Ruang Bilik enggau Raban Bansa Malaysia enggau Pemesai Pelilih Pusa.
Nitihku Zuraida, pengawa ngaga produk kraf jari bepelasarka ‘Plastik’ ambika banding ulih nyungkak penatai pemisi orang indu ba menua pesisir.
Iya madah, produk-produk kraf jari baka nya ukai semina ulih digaga ungkup diri sebilik tang patut digaga mayuh ngambi bisi dijual ngagai menua bukai seraya nambahka penatai pemisi orang indu.
“Aku pechaya orang indu diatu, udah majak kreatif, sida ukai semina ulih ngaga produk pengelandik jari baka nganyam tikai tauka raga tang bisi sekeda sida ngagai perengka pengelandik jari ngena surat kabar enggau ke bukai,” ku iya.
Berebak enggau nya, iya ngarapka orang indu ba menua pesisir enda muai awak nya nyereta kus ke nyaup ngangkatka pemansang orang indu empu.
“Anang beguai berunding genap barang kraf ke ditempa nya ulih ngasilka penatai belanja.
“Anang kita berunding genap produk kraf jari ke ditempa nya enda ulih meri untang, tang patut nemu asil nya kebendar tau nyaup nambahka penatai pemisi kita.
“Perintah ngarapka bala orang undu ke bisi penge- landik nempa barang kraf jari, anang takit nguji bejualka produk kita ngagai menua bukai,” ku iya.
Kebuah pia, ku iya tu mih peluang kita (orang indu) mantaika pengelandik enggau produk ke ditempa kitai ngagai orang luar.
“Giga peluang bakani deka ngelakuka priduk kita, kelimpah minta saup ejensi perintah bekaul.
“Anang sesekali malu betanya ngagai ejensi perintah ke bekaul ambika chunto baka Opis Menteri Dagang Temuai enggau ke bukai,”ku iya nerang silik.
Iya mega muji sukung ari raban undu ari dua buah genturung pendiau iya nya Kampung Spinang enggau Kampung Semarang dalam neruska program nya.
Sama bisi datai, Ketuai Genturung Pendiau Spinang, Ayu Nerawi, Ketuai Genturung Pendiau Semarang, Morni Salleh, Kaunselor Suria Azmi, Ketuai Indu PBB Paampang Spinang, Piah Narawi, Ketuai Indu PBB Pampang Genturung Pendiau Semarang, Fauziah Encem serea bala bukai.
Pengerami nya dirichah enggau bemacham aktiviti baka mandangka Chara Nyumai Bubur Lambuk, Pekit Ratu Kebaya, Pekit Ngaduka Bungai, Panggau Pemerindang MPWK, Pekit Poco Pocodan sereta bekaraoke.