Pengajar patut ngembing nembiak bepelasarka peresa psikometrik

KUCHING: Pemutus peresa psikometrik nembiak ngayanka pengulih tauka naka ni pengelandik sida ulih dikemansang.

Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah madahka pengajar patut ngena pemutus peresa nya ba genap nembiak.

“Tu chara kena pengajar ngemansang bala nembiak sida iya, nitihka pengelandik nembiak sida,” ku Fatimah madah, ke mega siku orang ke bepeneleba kala nyadi menteri ke betanggungjawab beratika pelajar sekula menua tu.

Iya madah munyi nya lebuh bejaku enggau bala pengarang berita pengudah ngepunka atur pengawa konvokesyen ke- 44 sereta meri perais ngagai bala nembiaka SJK Bintawa ditu, kemari.

Iya madahka peresa psikometrik deka nyengkaum pengelandik nembiak nya nyangka (ambika chunto) ba musik, linguistic, logik matematik enggau kinestetik.

Ambika chunto, ku iya, siku nembiak nyangka pengelandik ba pengawa seni tang ukai nembiak ke nyulut dalam akademik kelas.

“Tang, enti diperansang sereta diberi motivasi, nembiak nya nyangka jemah ila, deka ngangkatka nama Sarawak nengah pengelandik iya ba seni,” ku Fatimah.

Iya madah, Opis Menteri Pelajar betatika pemerat ba pemansang pelajar, alai ngelamatu, lebuh pemutus peresa udah pansut, iya bepelasarka ni naka pemayuh A ke di ulih nembiak nya, lalu dipadah ngagai bala mayuh, tang diatu enda agi digaga bansa nya.

Apai indai nembiak ke ngambi peresa UPSR, deka nerima empat ripot kemari, iya nya bekait enggau; (classroom assessment ( PBS); lumba enggau main, fizikal sereta aktiviti ko-kurikulum (PAJSK), peresa psikometrik (PPsi) enggau pemutus peresa UPSR.

Opis Menteri nya mega madahka sekula enda dikemendar ngerami bala nembiak ke nyulut dalam peresa nya.

Urung 443,794 chalun nembiak sekula ngambi peresa UPSR di serata menua taun tu.