Apai indai patut chakah mantu anak nyapai agenda TN50, ku Dennis Ngau
MIRI: Apai indai meseti chakah bejalaika pangku pengawa mantu bala anak sida nyikap diri napi pemar dunya kelebih agi ngiga kereja ti menyana sereta nyapai agenda Transformasyen Menua 2050 (TN50).
Kaban Kunsil Nengeri (ADUN) Telang Usan Dennis Ngau madai pemesai guna tetiap iku nembiak diseridi sereta ngulihka pengelandik khas setipak enggau pengidup dudi hari ti bepanggai ba teknologi deka nyadi tikas ti mar ngagai sida.
“Bala anak kemaya hari nyangka enda beratika pekara ti nyadi dudi hari, nya kebuah nyadi tanggungpengawa apai indai begulai enggau sekula nempa penyedar ke alai subjek baka Matematik, Sains enggau Jaku English, kelimpah chakah ngaul diri dalam kokurikulum endang beguna endar ungkup pengidup dudi hari sida.
“Tanggungpengawa tu ukai semina di sekula aja tang apai indai mega enda patut nejuka pelajar bala anak sida lalu meseti ngiga jalai ngelimpangka jam diri begulai sereta nerang pasal pekara tu,” ku iya lebuhka bejaku bejadika Pengerami Anugerah Nembiak Nyulut Sekula Primari Tudan (SKT) apin lama ke udah. Ku Dennis nambah, sida deka besemekih sereta nyadi kerani mega begunaka setipikit khas, dibanding suda sida ti bisi Sijil Pelajaran Malaysia (SPM) muntang bulih kereja enggau gaji ninting bulan.
“Nya kebuah aku ngansak apai indai beratika silik juluk TN50 ke alai chara menua mansang ke mua dalam kan- dang 30 taun ti deka datai, lalu sistem sekula mega meseti meruan dinamik, progresif sereta seruran sedia nerima evolusyen seriris enggau arus moden.
“Apai indai meseti ngemaruka diri sida enggau sebarang pekara ti nyadi ngelingi sida di nengeri, menua enggau dunya ngambika sida ulih besemekih enggau dunya ti seruran berubah, ngemansangka bala anak nentuka enda tinggal ari isu kemaya hari,” ku Dennis nambah.
Nitih ku iya, Kepala Menteri Datuk Patinggi Abang Johari Tun Openg enggau perintah nengeri nguji ngemerat sereta ngemansangka nengeri nengah ekonomi digital ke mega deka nyediaka awak besai ngagai rayat.
Kelimpah ari nya, iya mega muji penyapai SKT bejalaika pengawa nyadi sebengkah palan pelajar ti mujur.
“Sekula tu diberekat enggau ketuai ti bisi pengepuh enggau profesional, bala pengajar enggau staf sereta seruran bisi penambah ba pemanah pemutus peresa asil ari kerja siti tim antara raban pengatur pengawa sekula enggau mega apai indai.
“Sekula tu tentu 10 kali lipat besai agi ari semua sekula di sitak menua dipegai aku, tang patut terus ngemeranka semangat positif sereta ngetanka asil kereja ti manah,” ku iya.
Sama bisi datai Kepala Pengajar SKT Rohani Ismail, Penulung kanan kokurikulum Albert Bangau Pengarah, Chairman Serakup Apai Indai (PIBG) Mikewell Anyong, Kaunsilor Dominic Nyurang, Ketuai Raban Bansa Nasir Rahim.