Palan Tungkul Ati Sarawak nerima pemeri kereban dikena ngubat tungkul ati ari YJS
KOTA SAMARAHAN: Yayasan Jantung Sarawak (YJS) udah nyuaka kereban dikena ngubat tauka meresa pengerai tungkul ati ti berega sepenyampau RM285,000 ngagai Palan Tungkul Ati Sarawak, kemari.
Kereban nya disuaka Kaban Lembaga Amanah YJS Datuk Amar Jamilah Anu ba program ‘Handing Over Cardiac Equipment & Thanksgiving’ ke diatur ba Palan Tungkul Ati Sarawak, ditu.
Jamilah madahka YJS deka terus nempa kerejasama enggau Palan Tungkul Ati Sarawak awakka ulih meri bantu ngagai mensia mayuh di nengeri tu ke begunaka bantu servis tungkul ati, kelebih agi ke enda ulih ngeluarka belanja besai dikena berubat.
“Sehari tu YJS nyuaka lima unit Cardiac Mobile Monitoring System ti berega RM150,000 enggau seunit Ultrasound System ungkup Adult Echocardiography ti beungkus RM135,000.
“Duit ti dikena meli Cardiac Mobile Monitoring System iya nya asil ari program Heart Run 2017, ke diatur kena 24 September tu tadi, ke diatur Yayasan enggau Opis Fisi- oterapi, Palan Tungkul Ati Sarawak.
“Ngarapka ngena kereban tu ulih mantu ngangkatka pemanah servis Palan Tungkul Ati Sarawak, ti meri penguntung ngagai pesakit lebih agi,” ku iya lebuh bejaku ba pengerami nya.
Berebak enggau tu kemari Jamilah mega bisi nyuaka pemeri ngagai pesakit ba wad nyerumba Hari Krismas 2017 ke nyau deka datai.
Dalam jaku pengelalu kemari, Direktor Palan Tungkul Ati Sarawak, Dr Mohd Asri Riffin madahka kededua kereban nya beguna amat ngagai pesakit.
Dr. Asri madahka enggau pemanah kereban ti dikembuan Palan Tungkul Ati Sarawak diatu udah meri peluang ngagai pesakit nengeri tu berubat ba menua tu empu dibandingka sebedau tu diasuh tauka dianjung berubat ngagai Semenanjung Malaysia.
“Kitai meri besai terima kasih ngagai Yayasan Jantung Sarawak laban ti udah meri, nyukung sereta ngatur mayuh aktiviti penyedar bekaul enggau tungkul ati.
“Baka sehari tu, kereban ke diberi amat beguna iya nya Cardiac Mobile Monitoring System dikena matau pesakit ari moderate nggai risiko tinggi jantung maya sesi exercise. Tu ulih mantu ngelala tumu ‘ECG Abnormality’ sereta dikena nyeliahka arrhythmias ari ngeruga nyawa.
“Lalu Ultrasound System ulih mantu scan sereta ulih ngasilka gambar ultrasound ti bekualiti sereta jampat,” ku iya.
Kelimpah ari nya Jamilah ke mega Kaban Kunsil Nengeri Tanjung Datu bisi ngagihka belanja sepenyampau RM5,000 ngagai Gerempung Indu Misi Malaysia Pampang Sarawak.
Sama bisi datai ba pengerami nya kemari Ketuai Jabatan Kardiologi, Palan Tungkul Ati Sarawak, Dr Ong Tiong Kiam enggau Ketuai Opis Fisioterapi Palan Tungkul Ati Sarawak, Ismail Damit sereta ke bukai.