TDIH, SME Corp mujur ngatur program ‘Brand the Right Way’ 2 Disember tu tadi
KUCHING: Hub Inovasi Digital TEGAS ( TDIH) nengah kerejasama enggau bakih iya, SME Corp udah ngatur program ‘Brand the Right Way’ ungkup raban pedagang biak kena 2 Disember tu tadi.
Program tu diatur dikena mai kelala ulah ti manah dikemeran ngagai bala pedagang ba pengawa ngemansangka chap sida ba bemacham titik pengemun sereta ngatur enggau ngira chap maya iya mansang.
Antara topik ke dipejurai dalam program nya nyengkaum strategi chap, audit chap, penuduk chap enggau ngira pengangkun chap sereta ekuiti.
Program tu nyadi siti agi inisiatif ari TDIH ke alai tuju iya meri kuasa ngagai bala kaban ubah dudi hari sereta seriris enggau pengeran nengeri ngerumban ekonomi digital.
TDIH nyadi pelasar alai nerenak penau, pedagang ti nyukung sereta nempa inovator ungkup Sarawak.
Ketuai Pemesai Operasyen Tabung Ekonomi Gagasan Anak Bumiputera Sarawak (TEGAS) Awangku Merali Pengiran Mohamed ba sebengkah penerang berita madah, pengawa meri chap nyadi pugu pemujur besai ngagai bala pedagang dalam ekonomi digital kemaya hari.
“Taja pia, baka ni kitai ulih nempa enggau ngemeranka chap ti ulih besemekih?” ku iya, kemari.
‘Program Brand the Right Way’ dikenataika Azuar Zainuddin, iya nya penyanding penemun chap ti bisi peneleba besai ba pengawa begulai enggau sekeda chap pemadu bereja di dunya dalam bemacham sektor.
Azuar mega kala ngajar ba dua buah universiti Australia kampus Sarawak lalu apin lama ke udah, iya ngaul diri ba sekeda program pemansang dagang enggau bemacham gerempung nyengkaum TEGAS, Centre for Entrepreneur Development and Research Sdn Bhd (CEDAR) sereta Credit Guarantee Corp Malaysia Bhd (CGC), di serata menua.
“Lanskap digital endang udah ngubah ‘ pemain’ ba chap. Taja pia, juluk agi sama, nempa peragam, negapka pemutus sereta ngemeranka pengawa ngetan,” ku Azuar.
Nyadika tambah ngagai program pemansang pengawa dagang, TDIH mega nyediaka pemungkal peluang ungkup pengerambai, sambung mudah ngagai internet bepeneras tinggi, belanja enggau peluang matau, ekosistem manah ungkup pedagang, peneleba holistik sereta peneleba gaya idup.