Raban opis perintah diperansang bekerejasama enggau pengari rayat
JULAU: Raban ari mayuh bengkah opis enggau ejensi perintah ti gawa di Meluan sereta mega bala ketuai komuniti menua nya diperansang besaup gawa enggau pengari rayat nentuka ulih mai pemaik ngagai peranak dia.
Sida engka diberi pengawa ti bebida, tang sida patut meretika pekara tetiap iku sida bisi pengawa ke beguna endar dipejalai, pia ku Kaban Kunsil Nengeri (ADUN), Meluan, Rolland Duat madah rambau gempuru Pemesai Begulai Enggau Rayat di Rumah Engkulau, Wong Besi Api semak ditu, bedau lama udah.
Nyadi sebagi ari sistem ngenataika servis perintah, sida nitihka pematut meri komitmen enggau kereja siti tim nentuka pemutus ti optimum, ku iya nyemetak.
Baka ti diperatika naka ke diatu di Meluan, semua orang dalam sistem ngenataika servis perintah ditu patut nemu, sida napi pemar laban Pelilih tu agi jauh tinggal di belakang dalam sukut infrastruktur peminta baka sambung jalai, bekal ai beresi, bekal kuasa karan, arus penyambung enggau ke bukai, ku iya.
Di Julau, dikena nangkup semua pekara pemansang, iya begunaka semua dalam sistem ngenataika servis ngambika ransing agi gawa laban sida patut ngaga mayuh perambu kereja dikena nyukung peminta sida ba belanja, ku iya nerang.
Sebagi ari perambu iya nya nyikap bala ketuai komuniti ngena latih teknologi pemadah enggau arus penyambung ( ICT) ngambika sida ulih ngaga dagang online tauka nyual produk betanam betupi sida, ku iya nambah.
Rolland mega ngelalau pengereja pegawa perintah ti dianjung gawa ngagai Julau enggau sida ti dipadu nyadi ketuai komuniti ngambika sedia napi pemar, tauka sida deka dikumbai enda tetangkupka pengawa nyadi sebagi orang ti ngenataika sistem servis perintah ti ngemeranka rambai jaku, “People First, Performance Now”.
“Nyema sida enda ulih tetitihka singkang, sida tau sekalika minta diri pindah gawa ngagai endur bukai sereta enggau ati ti lurus gawaka bala pengundi, aku berani ngasuh rayat ngundi pengari rayat nyengkaum aku empu nyema sida enda mujur bejalaika pengawa,” ku Rolland.
Rolland nyemetak nandu misyen iya nyadi pengari rayat Meluan iya nya deka ngemanahka status sosioekonomi peranak dia ti ulih dijapai ari pengawa nyediaka penyikap perengka rama enggau perengka guna sereta infrastruktur.
Berebak enggau program nya, Rolland udah nyuaka geran Projek Mit Pemansang Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) lapan buah rumah panjai di kandang menua nya nyengkaum Rumah Engkulau ti nerima RM10,000.
Iya mega bisi ngemendarka belanja bela penyampau RM3,000 ngagai Biro Indu semua rumah panjai di sitak menua nya ungkup taun baru seraya ngansak sida muka akaun bank sida empu enggau naka penyampat.
Antara bala ke bisi datai iya nya pengari ari Opis Pelilih Julau, Catherine Sayu, Chairman Parti Rakyat Sarawak ( PRS) Pampang Meluan, Nyempah Sabot, bala kunsilor sereta ketuai raban bansa ke bukai.