Sektor dagang koperasi nerima peminta ti tinggi ke ulih ngangkatka pengawa dagang kelebih agi di menua pesisir
KUCHING: Bala pedagang mit di nengeri tu dipinta ngaul diri dalam sektor dagang nengah koperasi ba pengawa nyungkak penatai pemisi kelebih agi ungkup peranak di kandang menua pesisir.
Sapit Kepala Menteri, Datuk Amar Awang Tengah Ali Hasan madahka sektor tu bisi asil ti manah endar belalauka peminta ti tinggi.
“Taja margin mit, tang pengawa dagang tu mansutka penatai pemisi tinggi laban peminta ba barang diguna besehari sehari chukup tinggi.
“Iya tau dikumbai untung ba dagang tu (koperasi) belalauka penyampau ti tinggi enggau margin baruh,” ku iya.
Awang Tengah mansutka jaku nya lebuh ngulu Pengerami Makai Lemai Nyerumba Pengawa Bejadika Kus ‘ Refresher’ Pengatur Pengawa enggau Operasyen (DC) Koperasi diatur Suru- hanjaya Koperasi Malaysia (SKM) di sebuah hotel ditu, malam kemari. Sama bisi datai Menteri Muda Pemansang Dagang Mit enggau Jelan Pemesai ( PKS) Enggau Pedagang, Datuk Mohd Naroden Majais sereta Chairman Eksekutif SKM, Dato Dr Noor Zari Hamat.
Taja pia ku iya, pedagang koperasi meseti landik bekenaka perengka guna teknologi kemaya hari dikena napi pemar chara konvensional.
Beratika gaya sektor dagang domestik diatu ti mayuh agi ngena chap multinasional, Awang Tengah madahka koperator ti deka ngaul diri dalam bidang tu patut datai enggau pengelain ngambika ulih besemekih.
“Koperasi patut keluar ari zon lantang lalu sedia berubah ngambika bela nerima enggau ngena chara ngatur pengawa sereta sistem operasyen moden ti nyata agi sereta ngaul pelanggan,” ku iya.
Nya kebuah ku iya nambah, pengawa numbuhka polisi ekonomi digital endang bisi tanggungpengawa beguna endar sereta relevan enggau ubah jeman.
Pengawa bekenaka aplikasyen baru ku iya bala pedagang biak enggau raban nembiak ulih chakah gawa ba pengawa dagang enggau peneras.
“Tu siti ari pemar ngagai pedagang ti deka ngaul diri terus ba pengawa bejalaika ekonomi digital ngambika enda tinggal.
“Nyingkang ngagai pendigitalan nyadi siti pengawa meseti dikereja lalu badu agi nyadi pilih kitai,” ku iya.
Kenu ku iya, Malaysia datai ba penuduk ketiga dalam Indeks Pembangunan Runcit Global (GRDI) dalam taun nyin tadi entudi China enggau India.
Belalauka pansik tu, iya nyengala ngayanka menua kitai bisi pengulih ba pengerembai sektor renchit sekalika ba chara tradisional tauka digital.
Ba lansa ke bukai, Noor Zari madahka SKM bisi tagit RM12.6 bilion dipansutka koperasi dalam sektor dagang datai ba taun 2020.
“Peluang tu besai endar nyema kitai ulih nambah sereta ngenegapka bidang tu di Malaysia lalu terus nyadi pemegai besai dalam sektor tu,” ku iya.