Pansik dulu pengamat berita sebedau mansutka ba media rama
MARUDI: Peranak rumah panjai di menua pesisir kelebih agi di Baram patut berunding panjai sebedau mantaika sebarang isu ke nyadi ba media rama, kelebih agi pekara ti bedau ditemu sida silik, ngambika enda disalah guna sekeda raban.
Nangkan nya, Menteri Muda Kaunsil Kandang Menua, Datu Dr Penguang Manggil mega ngelalau peranak rumah panjai ngambika enda salah guna media rama dikena mantaika pengeringat ngagai perintah.
Iya ke mega Kaban Kunsil Nengeri (ADUN) Marudi madah, rayat di kandang menua dipegai iya patut meri peluang ngagai iya mutarka isu ti bisi lalu ngemai pemansang ngagai kandang menua sida berenggat, laban iya semina bisi awak nyadi pengari rayat sida pengelama setaun setengah aja.
“Taja dalam timpuh pandak nya, aku naka ulih gawa mai mayuh pemansang baka projek ngaga Tebing Sungai Baram enggau penekat nya, ngemanahka baru Jalai MiriMarudi lalu udah nya Projek Bekal Ai di kandang menua Beluru sereta mayuh agi ke bukai.
“Pekara ti beguna endar diatu iya nya rayat patut bekerejasama enggau perintah nentuka semua projek pemansang tu ulih bejalai enggau lanchar sereta berunding panjai sebedau mantaika sebarang pekara ba media rama,” ku iya.
Penguang mansutka jaku tu lebuh bejaku ba Pengerami Pemesai Begulai Enggau Rayat enggau Program Randau di Rumah Mathias Depa di Tapang Ragai, Sungai Peking di Tinjar, Hari Enam tu tadi.
“Pia mega enggau pemar ditapi perank di Sungai Peking, ti betapi enggau jalai ti rusak, nadai bekal ai (beresi), nadai nerima bekal kuasa karan lalu aku empu deka bebendar agi gawa mutarka semua penanggul tu, siti siti.
“Taja pia, anang mantaika pengeringat ba media rama tang kita patut berunding memanah sereta meretika isu nya,” ku iya ngelalau.
Ngagai sida ke bisi pelajar, Penguang minta sida mulaika diri ngagai menua asal lalu ngajar peranak di genturung pendiau, baka ni chara sida tau ngulih tauka minta projek lalu ukai nya ‘begau’ ba media rama lalu diri empu kelalu jampat nyimpul.
Ba atur pengerami nya, iya mega bisi nyuaka chek Projek Mit Pemansang Menua Pesisir (MRP) penyampau RM35,000 ngagai Komiti Pemansang Enggau Pengelikun Genturung Pendiau ( JKKK) Rumah Mathias lalu RM20,000 da agi ngagai JKKK Rumah Jilan, Sungai Sebatu.
Sama bisi datai bini iya, Datin Monica Ukong Jaya, Sekretari Politik Kepala Menteri, Alexander Asing, Chairman Kaunsil Pelilih Marudi ( MDM), Edward Mendai, bala pemesai opis perintah sereta bala ketuai komuniti ke bukai.