Kemeratka pelajar sekula bala anak
SARIKEI: Kaban Kunsil Nengeri (ADUN) Meradong, Datuk Ding Kuong Hiing ngelalau apai indai pemesai guna pengawa ngemeratka pelajar bala anak sida.
Iya nyemetak madahka pekara nya lebuh bejadika Pengerami Graduasyen SK Nanga Strass, Meradong semak ditu bedau lama, Ding madah ngagai apai indai ke alai pengidup dudi hari bala anak sida endang bepanggai ba pelajar.
Enggau pelajar ti menyana, bala anak ukai semina bisi pengelebih maya minta kereja tang mega ulih ngena memanah peluang dalam bidang bukai.
Iya ngelalau bala apai indai meri sukung sida ngagai polisi pelajar perintah sereta bekerejasama enggau raban sekula bejalaika nya.
Iya nyamin chara ngajar enggau belajar ti dikemeranka perintah endang diperunding engkeman dikena nangkup peminta pelajar Abad Ke-21 (PAK21), ku Ding.
Dikena ngangkatka agi pemanah belajarka Jaku English,’ High Immersive Programme’ ( HIP) udah dipejalai dikena nyediaka pelasar meransang bala nembiak berandau ngena Jaku English, ku iya nampung.
Ding bisi ngemendarka geran penyampau RM5,000 ungkup wang turu sekula sereta besemaya deka ngiga belanja dikena ngaga balai mayuh guna baru dalam taun baru.
Entara bala ke bisi datai Kepala Pengajar, Tuchun Making, pengari ari Opis Pelajar Meradong, Cecilia Yii, Chairman Serakup Apai Indai enggau Pengajar ( PIBG), Keneth Jemat enggau Penulung Kanan, Henry Kupar.