Tanah projek kerejasama sawit di Kanowit diakun
KANOWIT: Pengempu tanah projek pengawa begulai sawit keterubah nengeri ditu diatu ulih nyintak seput lantang pengudah status ngempu tanah sida udah diakun.
Kaban Kunsil Nengeri (ADUN) Ngemah Alexander Vincent madahka pengawa tu digaga nengah Surat Ngenukuka Tanah ari Kaunsil Ngemansang enggau Ngintu Tanah (LCDA).
“Dokumen tu deka nyamin aset pengempu tanah nyema pekara ngempu tanah sida dipetalat dudi hari,” ku iya lebuh bejadi pengawa nyuaka surat nya ngagai 14 iku tuai rumah enggau chairman Komiti Pemansang Kandang Menua ( ADC) projek ti dikelala ngena nama Blok B enggau D Kanowit, bedau lama udah.
Projek pengawa begulai ari baruh Boustead Pelita Kanowit Sdn Bhd udah dikemendarka perintah nengeri kena 1 Januari 1996 lalu udah nya nyadi projek keterubah di Sarawak.
Blok B dan D iya nya kandang menua mungkur 12,639 hektar pemesai ti ditanam ari semua tanah 14,400 hektar pemesai.
Iya mungkur 1,801 pesereta ti direjista ari 856 pintu ari 93 buah rumah panjai ti mungkur kandang menua Mapai, Bawan, Jih, Pedai di baruh Blok B seraya Kelimut enggau Maong di baruh Blok D.
Sempekat pengawa begulai antara pemeranak puku Kuala Sidim Berhad, LCDA enggau bala pesereta udah disain kena 6 Mei 1998.
Sepenyampay RM58.759 juta dividen bayar deposit udah dibayar naka 30 Oktober taun tu.
Ku Alexander, projek tu napi mayuh penekul lebuh keterubah dipejalai nyengkaum ditulak peranak di menua nya laban sida ngumbai perintah deka ngambi tanah sida.
“Taja pia diatu mayuh ti sedar baka ni projek tu deka meri pemaik ngagai sida ba pekara ekonomi.
“Aku pechayaka projek tu udah ngemai mayuh pekara ti manah ngagai pesereta sereta Kanowit dalam timpuh 20 taun pengudah iya dipungkal,” ku iya nerang.
Alexander mega ngansak pengempu tanah ngerebut peluang nyukat kelinggi tanag di baruh inisiatif baru enggau RM30 juta udah diagihka perintah ungkup pengawa nya di baruh Bajet 2018.
Ba lansa ke bukai, Menijar Dagang Agro LCDA Francis Kiyuk madahka sepenyampau 14,639 hektar tanah di Kanowit udah ditanam sawit ari 43,000 hektar ti dikemendarka perintah nengeri.
Sama bisi datai Menijar Besai Boustead Estate Agency Sarawak, Rozaini Abdul Ghani enggau pengari ari Opis Menteri Betanam Betupi Moden, Tanah Adat enggau Pemansang Kandang Menua, Danny Lansdale Rajau.