Nembiak,pengajar ari SK Ulu Entabai udah nemuai seraya belajar ke Mengeri Kuching
JULAU: Sekula Primari (SK) Ulu Entabai udah ngatur program nemuai seraya belajar ngagai Mengeri Kuching ungkup nembiak Primari Enam, apin lama ke udah.
Bisi 12 iku nembiak disempulang enam iku pengajar, tiga iku kaban Serakup Apai Indai enggau Pengajar (PIBG) sereta tiga iku staf sekula udah berangkat ngelawa indu mengeri kena 25 November lalu mulaika diri kena 28 November tu tadi.
P e n u l u n g K a n a n (Kokurikulum), Wan Deros Wan Badli ti nguluka raban nya madahka batang tuju penemuai nya dikena meri pengelala ngagai bala nembiak ba rampa menua enggau gaya idup din mengeri ti jauh bebida dibanding enggau gaya pengidup sida di menua pesisir.
Penemuai tu ngemai reti chukup besai sereta pengaga ngagai semua pesereta, kelebih agi ngagai bala nembiak laban tu peluang keterubah sida bejalai nemuai ngagai indu nengeri.
Seraya di indu nengeri, raban nya udah dibai nemuai ngagai mayuh bengkah endur ti narit ati baka Kampung Budaya, Tebing Sungai Kuching, Jong Crocodile Farm, Begunan Aum Kunsil Nengeri ( DUN); Astana Negeri Sarawak; Muzium Sarawak, Unimas, UiTM enggau palan bebelika barang, ku iya.
“Ngagai bala nembiak, tu peneleba ke baru diasai, meda mayuh utai ti nadai di kandang menua pesisir, baka begunan ti tinggi, penyekut jalai enggau gaya pengidup ti kiruh di mengeri.
Belanja penemuai nya udah dipelanja Kaban Kunsil Nengeri (ADUN) Meluan, Rolland Duat, ku iya.
Ngarika sida seraban enggau sekula, Deros meri terima kasih ngagai Rolland ti udah gerah jari, seraya nambah, udah ngagihka RM10,000 ngagai sekula dikena ngatur mayuh macham program taun tu enggau taun nyin tadi iya udah meri RM15,000 ungkup belanja PIBG sekula.