Sukung ari KDRM nyaup mutarka penanggul dalam pengawa dagang ke ulih ngeruga pemansang ekonomi
KUCHING: Sukung enggau kerejasama rat ari Opis Kastam Diraja Malaysia (KDRM) endang beguna endar dikena ngubah Sarawak ngagai ekonomi digital ke bendar, pia ku Kepala Menteri Datuk Patinggi Abang Johari Tun Openg.
Ku iya pengawa numbuhka ekonomi Sarawak nyangka enda ngerembai mansang enti nadai disereta bala pemain ekonomi iya nya sektor peribit.
“KDRM udah nyenggala ngayanka penyapai chukup manah sebedau tu. Ba pengawa kitai ngubah Sarawak nyadi ekonomi digital, aku andal amat opis tu deka seruran nyukung perintah nengeri enggau bemacham servis ke bisi disedia.
“Isu pengawa dagang meseti diputar enggau jampat dikena nyeliahka aktiviti ekonomi ti nekul lalu ngelubahka pemansang.
Iya mansutka jaku nya ba jaku iya dibacha Menteri Wang Kedua ke lalu nyadi Menteri Dagang Antarabansa enggau e-Perdagangan Dato Sri Wong Soon Koh rambau Pengerami Malam Apresiasi KDRM Sarawak di sebengkah hotel ditu malam kemari.
Abang Johari madah patut dikeingat kerejasama antara sektor peribit enggau KDRM di Sarawak seruran semak sereta patut dikemansang enggau randau, mega pejurai seruran diatur bejuraika isu ti nyangka bisi nyadi.
KDRM udah nyenggala ngayanka penyapai chukup manah sebedau tu. Ba pengawa kitai ngubah Sarawak nyadi ekonomi digital, aku andal amat opis tu deka seruran nyukung perintah nengeri enggau bemacham servis ke bisi disedia. Datuk Patinggi Abang Johari Tun Openg Kepala Menteri
Nitih ku iya, Sarawak enda ulih ngerembai mansang baka selama laban iya patut sebaka enggau nengeri ke bukai sereta dunya mansang ke bukai.
“Sarawak enda ulih sebaka enggau orang bukai nyema terus bejalaika dagang baka selama. Sarawak patut bejalaika dagang ngelui ari selama iya nya ngalih ari dagang konvensional ngagai ekonomi digital, kitai dekaka ekonomi Sarawak dikemansang ngena teknologi digital,” ku iya.
Ku iya, ba tuju nya, perintah nengeri serius bejalaika pengawa ngangkatka pemanah infrastruktur arus penyambung enggau multimedia dikena nyukung pemansang ekonomi digital.
Pengelaju arus internet di nengeri tu ku iya deka ditambah ngagai abis nadai empat terabit sesikin seraya di kandang mengeri peneras (internet) ba tetiap isi rumah abis nadai 50 ngagai 100 megabit sesikin.
Perintah nengeri mega ku iya udah ngagihka RM1 bilion dikena ngaga infrastruktur enggau tambah RM500 juta ari perintah besai ti dikemendar dalam Bajet 2018. “Ekonomi Digital tentu deka meda bisi penambah ba aktiviti e-dagang ukai semina di Sarawak aja tang mega enggau dunya luar.
“Ordinan Lembaga Multimedia Sarawak udah dikemendar rambau Aum Kunsil Nengeri (DUN) apin lama ke udah, iya deka nyediaka langkar kereja matau aktiviti ekonomi digital, semina Sarawak aja lalu nyadi keterubah bejalaika pengawa tu ti deka mungkur pengelikun siber,” ku iya nerang.
Ku Abang Johari nambah, nyadi sebagi ari transformasyen digital Sarawak, perintah nengeri deka ngelancharka Big Data dalam bulan April 2018 ti ngemendarka penerang dikunsi sektor perintah enggau peribit.
“Aku andal pengawa bekunsika penerang deka nyaup ngangkatka ekonomi kitai baka ti udah dipeda nyadi di menua bukai baka Estonia enggau Finland,” ku iya.
Beserimbai enggau pengerami nya, 12 anugerah diberi ngagai pelanggan KDRM Sarawak iya nya 12 sarikat ti dipilih belalauka sekeda kriteria.
Serakup Pengimport enggau Dagang Entukar Melayu Malaysia (PEKEMA) Sarawak ngetuaika rintai penerima anugerah pengudah dipadu nyadi Penyumbang Duti Import Tertinggi.
Dientudika Bintulu Port Sdn Bhd ( Anugerah Hub Logistik Terbaik), Hotel Imperial Miri (Penyumbang Tertinggi Cukai Pelancongan).
Seraya semilan da agi sarikat nerima anugerah pemansut pemadu tinggi Chukai Barang enggau Servis ( GST) ba sekeda sektor.
Bala penerima anugerah nya iya nya Bytechnologies Sdn Bhd (Sektor Teknologi Maklumat), Lebuh Raya Utara Sdn Bhd ( Sektor Pembinaan), Golden Palm Harvest Sdn Bhd ( Sektor Perladangan), Murum Hidro Power Generation Sdn Bhd (Sektor Kejuruteraan Pembinaan), Lembaga Penyatuan dan Pemulihan Tanah Sarawak (Sektor Pertanian), Dewan Bandaraya Miri (Sektor Perbandaran), Harbour Link Marin Services Sdn Bhd (Sektort Perkapalan), Dayang Enterprise Sdn Bhd (Sektor Perkhidmatan Kejuruteraan) sereta Syarikat SESCO Berhad (Sektor Utiliti).
Sama bisi datai, Sekretari Persekutuan Sarawak Dato’ Mansor Man, Sapit Sekretari Perintah Nengeri Datu Ismawi Ismuni, Direktor KDRM Sarawak Datin Sharifah Halimah Tuanku Taha, Presiden Balai Dagang enggau Industri Dayak (DCCI) Datuk Joseph Salang Gandum enggau Presiden Serakup Pemesai Kanan Kastam Sarawak Yussuf Drahman.