Mensia mayuh ti ngulu ‘Miri City Christmas Parade’ dilalau nyaga pemeresi

MIRI: Bala pesereta enggau mensia mayuh ke deka ngulu ‘ Miri City Christmas Parade’ ti deka diatur kena 9 Disember tu, ditangkan ngena tung uras ti bisi disedia ba tetiap sukut Miri City Fan maya atur pengawa nya.

Pengawa renggat ke- 10 nya, ku Datuk Bandaraya Adam Yii kemari, ngadang bisi disereta 45,000 iku pesereta ari 20 bengkah gerija di serata Miri sereta mega bala pengusung enggau peranak datai ari pupu bansa enggau jalai pengarap.

“Maya ngerami Krismas, patut mega ngayanka diri siruka rampa menua sereta enda sepeneka ati muai uras, buai ngena chara ti patut,” ku iya madah ngagai pengarang berita pengudah baum kemari.

“Tentu mega jaku tangkan deka dikeluar ba hari pengawa nya dipenyadi, seraya ngerahka tim meresi ba pagi hari siti ngambika meresi silik taman seraya nentuka taman rekreasyen pulai beresi,” ku Yii.

Ba lansa ke bukai, dua malam sebedau hari pengawa nyadi, ku Yii, rehearsal deka dipejalai ari tim merindang sereta sida mega deka nguji pun kayu besai Krismas nentuka semua iya bejalai enggau lanchar.

“Taun tu, kami temegah ati madahka kayu Krismas pemadu tinggi, 42 kaki peninggi, nya kebuah peranak Miri, bala temuai enggau pengusung ditesau datai magang ngayam pemanah rampa nya,” ku iya.

Pengawa bejalai bebala mayuh deka ngepunka pejalai ari Miri City Fan ngelawa Jalai Sylvia, Jalai Brooke, Jalai Kingsway, Jalai Puchong, Jalai Padang, Jalai Melayu, Jalai Nahkoda Gampar, Jalai Cina, Jalai Bendahara, Jalai North Yu Seng, Jalai South Yu Seng, Jalai Merpati enggau Jalai Kipas sebedau nikal ngagai Miri City Fan.

Berindik ari nya, jalai deka ditutup berengkah ari pukul 5 lemai, Yii mega ngingatka bala pesereta enggau mensia mayuh nentuka diri datai tumu ba endur nya lalu paking memanah ngambis sida enda ngasuh sebarang penyekut jalai.

Batang pengerami ba pengerami pemadu besai di Miri taun tu deka dipenyadika Sapit Kepala Menteri Datuk Amar Douglas Uggah Embas.