NGO ti ngembuan juluk deka nyendia platform ngemansang sereta ngangkatka jaku Iban enda dikelalu
KUCHING: Sapit Kepala Menteri Tan Sri Datuk Amar Dr James Masing madahka pemansang jaku Iban enda tau enda diangkat nyadi manah agi.
Iya ngelaluka NGO Dayak ti ngembuan juluk nyendiaka platform ke pemansang jaku nengah pelajar, seminar tauka pekit baka bejaku ba mua mayuh (pidato) enggau nengkebang lagu patriotik.
“Kami perintah deka nyendiaka infrastruktur ngagai sebarang NGO ti ngembuan juluk deka ngelaku, ngemansang sereta ngintu jaku. Kitai ukai deka bepilih bulu tang jaku Iban enda tau enda diangkat ngagai mensia mayuh laban nya kereban dikena berandau sereta nyadi identiti bansa Iban,” ku Masing ti mega Menteri Pemansang Infrastruktur enggau Perengka Pengangkut sereta mega Kaban Kunsil Nengeri Baleh.
Ngambika pekit tu nyadi bisi reti agi NGO ba sekeda kandang menua bukai patut ngatur pekit ke sebaka kediri ngiga pemenang lalu nganjung sida nya bepekit ngagai pekit final ke diatur ba indu mengeri Kuching,ku iya.
Masing madah munyi tu pengudah nerima penemuai basa ari komiti pengatur UB-Aedil Iban Pekit Bejaku Ba Mua Mayuh( Pidato) enggau UB-Ranyai Pekit Lagu Patriotik ba opis iya di Petra Jaya bedau l ama udah.
Nitihka penerang berita ti dikeluarka komiti pengatur, Utusan Borneo (UB) Seksyen Iban nyadi ketuai pengatur pekit ti disukung NGO bukai baka AEDIL (Gerempung Pemansang Pelajar Jaku Iban), Cats Radio ba pekit Bejaku Ba Mua Mayuh (Pidato) lalu pia mega ba Pekit Lagu Patriotik Iban ke disukung Ranyai Studio, Cats Radio enggau Rumah Pansuh Dayak (RPD).
Pekit Bejaku Ba Mua Mayuh nya diperambu diatur dalam bulan Ogos taun 2018 lalu Pekit Lagu Patriotik Iban diperambu diatur ba bulan September 2018 ditu.
Pengawa ngelaku sereta atur bekaul enggau dua bengkah pekit tu deka dikeluarka ba surat berita enggau media rama baka Facebook enggau Whatsapp belama.
Penerang silik pasal pekit tu tau ditanya ngagai Mathias Kassap ba lumur 0168726064 enggau Churchill Edward ba lumur 0178081485.