Tim RS1 deka muka servis kaunter mobil betemu enggau mensia mayuh

SIBU: Tim Pelin Sibu 1 (RS1) deka bejalaika servis kaunter mobil betemu enggau komuniti ba palan ti suah dilawa mensia mayuh berengkah hari Enam tu.

Ketuai Tim RS1 Datuk Andrew Wong madah, palan keterubah ke deka digaga servis tu iya nya ba palan komersial Rejang Park (Klinik 1Malaysia) ari pukul 9 pagi nyentuk 12 tengah hari.

“Kitai deka nyediaka servis nerima serebana sereta tanya ari mensia mayuh, pom peminta Bantu Rayat 1Malaysia (BR1M) 2018 sereta ngechik status rejista pengundi.

“Kelimpah ari nya, servis ngerejista komiti polisi komuniti, peresa mata enda bebayar enggau peresa darah tinggi enggau gula mega bisi disediaka,” ku iya.

Lebuhka ditemu pengarang berita kemari, Andrew madahka servis kaunter mobil RS1 deka diteruska ba Taman Poh Yew sereta palan komersial Pulai Li Hua kena 10 Disember.

“Taman Xin Hua, palan komersial Taman Seduan deka nyadi palan ti ketiga ba program tu iya nya kena 16 Disember lalu deka diteruska ba Pasar Grand Height kena 17 Disember, palan komersial Sungai Merah (mua Empire Gym) kena 23 Disember sereta palan komersial Unicity kena 30 Disember.

“Servis kaunter mobil deka digaga ba palan komersial Ulu Sungai Merah kena 6 Januari, Kampung Sentosa (7 Januari), Kampung Jeriah (13 Januari), palan komrsial Jalan Belatok (14 Januari), palan komersial pegung Delta (depan Hapiness Cafe) kena 20 Januari lalu palan kepenudi iya nya di Kampung Bahagia Jaya kena 21 Januari,” ku iya.

Beserimbai enggau nya, Andrew minta mensia mayuh datai ke palan kaunter mobil RS1 nitihka haribulan ke udah ditetapka ngambika ulih nerima servis ke udah disediaka.