MDC merambu netapka bayar ungkup pedagang di kaki lima

MARUDI: Seksyen Penerit Adat ba Kaunsil Pelilih Marudi (MDC) merambu deka netapka bayar ngagai sebarang perenchit ba pengawa sida mandangka barang ti dijual ba kaki lima pasar di kandang menua nya.

Bayar nya nitihka sekaki pemesai deka diasuh mayar RM0.50 sebulan lalu ambika chunto, tiga kaki pemesai enggau 18 kaki pemanjai deka diasuh mayar RM27 sebulan.

Taja pia, Chairman Balai Dagang China Baram, Chua Seng Yong minta bayar nya dikurangka agi ngagai RM13 sebulan ari RM27 sereta RM216 ari ke RM324 setaun. Permit ‘sementara’ deka dibayar sekali setaun tauka dua kali setaun.

Pemesai Penerit Adat MDC, Baleng Bit madah dalam aum begulai enggau sekeda perenchit ditu, semua pengempu kedai meseti nganjung peminta ngagai raban kaunsil ba pengawa nyuwa kaki lima. Tetiap tiga kaki ari baruh ngagai atas mua kedai nadai bebayar lalu semua bayar bekaul udah diterang silik rambau aum nya.

Kaki lima tu nyengkaum jalai ditengah mensia mayuh dalam begunan enggau ruai tauka tanju ba begunan nya laban tu udah digaga nyadi palan ungkup mensia mayuh.

Local Authorities Ordinance 1996 (raban Kaunsil Kandang Menua) (Pekara Pemeresi) by laws 1999).

Ku iya, ari Laws 26-(1), nadai siku patut ngengkah, mandang, nyimpan tauka ngitang ba atas tauka atas sebarang kaki lima, sebarang barang, surat tauka kereban, sekalika dijual tauka tuju ke bukai.

Nya kebuah, Ukum – Penyalah keterubah ( RM1500.00), penyalah kedua tauka ukum kedua ( RM3000.00 tauka di jil semilan bulan, tauka ditinggang kededua ukum nya).

Tuju atur nya dikena ngemuntangka pengawa raban kaunsil nagang enggau matau pengawa pengempu kaki lima ti ngena iya bejualka barang. Dikena nagang ped- agang bekenaka kaki lima ba sebarang maya, nentuka bisi awak ngagai mensia mayuh bejalai sereta barang dijual ditusun memanah enggau beripih sereta beresi.

Kelimpah ari nya, dikena ngangkatka tikas pemanah kaunsil enggau bayar suwa ba tetiap endur ti dikena ba kaki lima.

Polisi enggau perambu deka dikemendar dalam aum kaunsil ti deka datai ngambika dipejalai nyadi Polisi Kaunsil ke baru. Begunaka pejurai antara pengempu kedai di Marudi, Beluru, Lapok enggau Long Lama ngambika diterang pasal pejalai polisi sebedau iya dipejalaika.

Pemaik iya ngangkatka tikas pemanah Kaunsil, muntang agi bejalaika pengawa matau, jaga pemeresi sereta nentuka gaya rampa menua sereta meri pengelantang ngagai mensia mayuh.

Aum tu mega udah digulu Chairman MDC, Kuansilor Edward Mendai enggau Sekretari MDC, Petrick Linggi Taboh.