Program bebasikal 31 Briged Malaysia Rejimen Sempadan Sarawak nerima sukung ti manah
BINTULU: ‘Ekspedisi Berbasikal 31 Briged Infantri Malaysia Rejimen Sempadan Sarawak’ iya nya siti ari pengawa ngerapitka kaul raban soldadu ngambika ulih ngelala peranak di kandang menua nya seraya ulih ngelatih sida kering ari sukut runding, fizikal sereta mega ulih negutka kaul enggau ejensi perintah semanjai pejalai program nya di nengeri tu.
Pegawai Pemerintah Batalion Ke-7 Rejimen Sempadan Leftenan Kolonel Rokaib Ahmad madah, program tu mayuh meri pemaik lalu sida ti bekereja nyadi soldadu patut nemu gaya rampa menua di kandang menua Sarawak ke mega nyadi palan sida ngaga operasyen jemah ila.
Ku iya, kelimpah ari program ngena basikal ti berengkah ari CIQ Sungai tujuh nyentukka Tanjung Datu, Sematan iya nya urung 988 kilomenter penyauh ( ke mega deka begunaka 10 hari pejalai berengkah ari 5 nyentuk 14 Disember), sida mega deka bejalaika program Projek Jiwa Murni di tetiap palan endur sida singgah.
Leftenan Kolonel Rokaib madah, diatu program nya dipejalai nitihka langgur ke udah dikerandau enggau peranak Rh Vicky nengah Projek Jiwa Murni iya nya meresika kandang endur ngelingi rumah panjai nya.
Ku iya, Batalion Ke- 7 Rejiman Sempadan udah ditumbuhka ba taun 2015 tang aktif berengkah ari bulan April 2016.
31 Briged Malaysia Rejimen Sempadan ditumbuh di nengeri tu dikena nyaga sempadan entara Kalimantan, Sabah enggau Sarawak.
Ku iya, naka ke diatu penyampau raban batalion di Bintulu iya nya 258 iku lalu taun tu ditambah ngagai 348 iku.
Madah enggau silik bekaul program nya, ku iya, kenyau ari program nya dimunka berapa hari ti udah, nadai penanggul ti besai ke udah ditapi, semua agi nitihka langkar program.
“Pengudah Sungai Tujuh bisi berapa iti palan ke deka endur ngetu sebedau tu iya nya di Bekenu ke mega kami bisi ngaga Projek Jiwa Murni di Batu Niah, lalu ke seharitu di Rh Vicky iya nya projek ti kedua lalu bisi berapa it agi di Sibu, Sri Aman nyentukka Sematan,” ku iya.
Ba kenang ke bukai, Tuai Rumah Vicky Angkalom madah, program nya endang engkeman lalu sida sigi nerima pengawa nya ti lalu mega rumah sida dipilih nyadi tempat singgah sereta palan bejalaika Projek Jiwa Murni ari Batalion Ke- 7 Rejimen Sempadan.
“Sida udah betemu enggau peranak rumah panjai kami ke bisi 34 pintu bilik lalu ngembuan 203 iku penguni,” ku iya.
Ku iya nandu, program tu mega ukai semina ngaul peranak rumah panjai nya aja, tang sama bisi ngambi bagi iya nya ejensi perintah baka Polis DiRaja Malaysia (PDRM), Opis Pelilih Tatau, Opis Pekara Khas (JASA) P214 Selangau sereta be- berapa ejensi bukai.
“Aku bisi dipadah iya nya urung 200 iku orang ke datai ngagai rumah panjai kami, pia mega aku meda program tu endang manah lalu patut selalu digaga,” ku iya.
Sama bisi datai ba program nya Ketua Jabatan Pencegahan Jenayah dan Keselamatan Komuniti Indu Opis Polis Pelilih Tatau Sub inspektor Abdul Aziz Abdul Rahman, Ketuai Opis Polis Tatau Sarjan Senon Rigok, pengari ejensi perintah sereta peranak di kandang menua nya.