Program Meri Darah diatur KBK mujur
KUCHING: Kelab Badminton Kenyalang (KBK) nyaup Tabung Darah Sepital Besai Sarawak (SGH) ba pengawa kimpin meri darah kemari, 8 Disember.
Nitih ku KBK, pengawa tu sebagi ari program outreach komuniti sida.
Presiden iya, Petrus Ngalih Tinggi madah, kelimpah ari program outreach komuniti, program ninting taun KBK nyengkaum ngatur pekit main badminton ungkup raban nembiak sereta nyediaka servis teknikal ngagai bala komiti pengatur badminton ke bukai.
Aktiviti sida nerima sukung ari patron Menteri Bekal Ai enggau Elekterik Menua Pesi- sir Dato Sri Dr Stephen Rundi Utom, ku iya seraya nambah, sida deka ngatur pekit main badminton ungkup raban nembiak Dayak di Bintulu dalam taun baru berindik ari pemayuh peminta.
Nitih ku pemesai perubat Tabung Darah SGH, Dr Ttarcini Engatramana, sida seruran suntuk bekal bansa Darah A enggau Darah O laban mayuh diguna bala pesakit.
Penyuntuk tu agi ditapi taja kimpin meri darah suah dipejalai tetiap taun, ku iya.
“Tebal agi pesakit ke ngempu bansa Darah A lalu bansa Darah O tu universal, bala pesakit enggau Darah A mega ngena Darah O, nya kebuah suntuk bekal darah bansa tu,” ku iya nerang lebuh dirandau rambau kimpin meri darah KBK-SGH diatur di kedai besai Giant Tabuan ditu, kemari, 9 Disember.
Ku iya, kelimpah ari kedai besai Giant, endur bukai ungkup pengawa meri darah kemari iya nya di Klinik Teddy di Bau.
Sehari tu, 10 Disember, kimpin deka diatur di kedai besai Boulevard enggau Emart Matang, ku iya seraya ngapil ngambika mayuh agi orang datai meri darah.
Ku iya, maya ti begunaka endar ke darah maya musim pengerami maya penyampau tubuh sida ke meri darah kurang.