Tu dikena nentuka peneras arus telekomunikasyen enggau bemacham servis multimedia ke murah ulih disedia perintah
MELAKA: Peneras arus telekomunikasyen enggau bemacham servis multimedia ke murah sereta mungkur internet ke serata menua tu ulih disediaka perintah enti ungkus ngaga infrastruktur sereta operasi nya ulih dikurang, ku Kepala Menteri Datuk Patinggi Abang Johari Tun Openg.
Iya madah pengawa tu ulih digaga enti bisi polisi ke mentas, ke ngena penambah infrastruktur ke udah bisi diatu, ti ngemendarka mayuh penyereta dalam ungkup servis bansa nya.
“Enti ungkus nya kelalu besai, ngelui ari penyampau ke ulih dibayar penguna, sida iya enda ulih ngubah ngena palan digital. Nya kebuah, infrastruktur tu enda tau enda digaga mayuh penyereta,”ku Abang Johari.
Iya madah munyi nya lebuh bejaku maya nutup pengawa (retreat) ke digaga ketuai opis perintah Sarawak nyengkaum pemesai kanan opis perintah ba sebengkah hotel ditu, kemari.
Ba pengawa nya bedau lama tu tadi, iya digulu urung 170 pemesai ke bisi enggau ‘retreat’ tiga hari, ke ngembuan pemerat nguingka pemerat pemansang Sarawak merejuk ari chara ke lama nyingkang ngagai ekonomi digital (DE).
Sebedau nya, ba jaku Sekretari Perintah Menua, Tan Sri Datuk Amar Morshidi Abdul Ghani mantaika resolusyen asil ari pansik (lab) mungkur 17 bengkah pemerat japai pemerat transformesyen nuju DE.
Sama bisi enggau ngulu atur pengawa nya, Sapit Kepala Menteri Datuk Amar Douglas Uggah Anak Embas.
Maya pengawa nya, nyengkaum betatika pekara bekait enggau DE, Abang Johari ti mega nyadi Menteri Pemansang Mengeri enggau Rampa Menua madahka, pemisi infrastruktur voltej besai tiang komunikasyen ke dikembuan ulih kompeni kuasa, Sarawak Energy (SEB) baka ke diatu, ke mai kabel ‘Fibre Optics’ patut ulih dikena, sama enggau kompeni telekomunikesyen ( Telcos) bukai, ngambika ulih ngurangka kos, sereta nyendiaka peneras internet di menua tu.
“Rugi endar pemisi nya enti enda ngena tiang komunikasyen SEB ke mai kabel ‘fibre optics’ mindah pemesai data, ke nyadi pemerat nyukung DE,” ku iya.
Bekait enggau DE tu mega, iya madahka Sarawak deka mungkal Opis Sarawak Multimedia (Sarawak Multimedia Authority tauka SMA) nyadi sebuah ejensi ngulai sereta megai ( multi- player services).
“Jalai ke nyauka sebaka dikena ba menua bukai, entara nya Estonia, alai rampa (multi-media) udah mujur ngemendarka internet 4-G dikena di serata menua nya.
“Nya alai, aku pechaya polisi ke mentas (liberal) enti ngipak infrastruktur tu, ulih mantu ngurangka kos nyen- diaka infrastuktur internet di serata menua sereta jalai entarabansa ngagai dunya luar,” ku iya.
Bepelasarka ungkup bajet ngaga infrastruktur tu, bedau lama tu tadi, ba aum Kunsil Nengeri udah ngemendarka penambah ungkup RM1 billion ari ( State Coffer) dikena ngaga infrastruktur tu, nyaup penambah ungkup ke diberi Perintah Besai, iya nya RM500 juta dikena nyendiaka infrastruktur peneras internet di Sarawak.
“Sarawak enda tau enda ngambi ulih ari teknologi digital, ngubah ekonomi menua tu ngagai DE, ari baka ke udah, chara tradisional, laban semina nengah DE aja ke ulih ngangkatka menua tu seikas enggau menua bukai sereta DE dunya.
“Sarawak begunaka pemerat nyapai penumbuh GDP 6 persin (%) tiap ninting taun, ngambika ulih nyapai pemansang pemisi ekonomi manggai 2030.
“Nya kebuah, DE tu berat endar ba tiap iku kitai sereta menua tu,” ku iya.