Atur nikika gaji orang gawa perintah ulih ngelai ekonomi menua tu tegap

KUCHING: Atur nikika gaji orang gawa perintah dua kali sebedau manggai taun 2020 ulih nyaup ngelempung tating belanja ti majak besai.

Berindik ari nya, pinta Presiden CUEPACS Datuk Azih Muda nerima sukung ari CUEPACS Nengeri Sarawak( CNS) ti betuaika Chairman Ahmad Malie.

“Ba runding CNS, pinta presiden CUEPACS chukup ngena berindik ari Perintah Nengeri sigi ulih meri bantu’khas’, iya nya ngelui ari ke diberi Perintah Besai.

“Perintah Besai patut nyadika chunto ngagai Perintah Nengeri sereta mega perintah menua bukai diak kitai ngembuan ekonomi ke ditegap munyika padah raban ketuai perintah.

“Atur nikika gaji orang gawa perintah dua kali sebedau manggai ba taun 2020 deka mandangka kitai ngembuan pemisi enggau ekonomi ke tegap,”ku Ahmad nengah surat penerang berita kemari.

Iya nambah, atur nya mega deka mandangka penyiru perintah ngagai rayat, ti seruran mendingka pinta enggau peneka rayat.

Bedau lama tu tadi , Azih ba sebengkah program di Terengganu minta perintah merundingka dua perambu ti ulih nyaup ngelempung tating belanja urung 1.6 juta iku orang gawa perintah menua tu.

Atur nikika gaji orang gawa perintah dua kali sebedau manggai ba taun 2020 entara seiti perambu ti dikenatai ngagai perintah Besai.

Azih madah ba taun baru tu ila, ungkus belanja beridup ninting hari deka nambah ke alai pekara nya deka nekul pengidup rayat ketegal ikas gaji mengkang sama.