SME di Sarawak muntang mujur sereta besemekih nuju revolusyen Industri 4.0
KUCHING: Dagang mit enggau Jelan Pemesai (SME) di Sarawak muntang bulih pemujur sereta ulih besemekih nuju revolusyen Industri 4.0.
Menteri Muda Industri enggau Puku, Malcolm Mussen Lamoh madah penyampau SME di Sarawak ngarika 6.7 peratus ari semua 907,065 SME di Malaysia ke alai urung 61,000 dagang di Sarawak bekaul enggau SME.
“Asil ari SME di Malaysia sereta Sarawak chukup berat ba atur nempa pengawa puang lalu udah ngangkat standard pengidup rayat Malaysia.
“Ketegal nya aku pechaya SME di Sarawak lantang nempa pemujur kelimpah ti ulih besemekih nuju Industri 4.0,” ku iya ba Program Outreach Industri 4.0 di Palan Aum Borneo Kuching( BCCK) ditu, kemari.
Malcolm nambah, enda mudah ungkup SME kelebih agi enti sida bisi pengerawan sereta pengirau sentang baka ni deka ngepunka singkang nuju Industri 4.0.
“Industri 4.0 tu sebengkah revolusyen digital. Tajapia, singkang nitihka industri tu analog.
“SME patut nanya sekalika proses digital tu ngeruga dagang sida lalu sida meseti ulih beratika pemaik Industri 4.0 ari tiga sukut ke bebida,’ku iya.
Tiga sukut bebida ke disebut iya nya produktiviti dikena ngurangka ungkus semua sereta ngangkatka ikas produktiviti, kualiti dikena ngurangka pengilap mensia enggau fleksibiliti dikena ngurangka timpuh nuju makit.
Program outreach kemari diatur Opis Menteri Dagang Antarabangsa enggau Industri ( MITI) nengah kerejasama SME Corp. Malaysia.
Program digulu lebih 300 penyereta iya nya sida ke bisi kaul enggau SME sereta pengari ari Opis Menteri, ejensi, gerempung, balai dagang enggau pelajar universiti.
Tiga iku pengelicha diundang ngenataika batang jurai bekait enggau Industri 4.0, iya nya ari MITI, Palan Pemansang Pengelandik Penang (PSDC) enggau MIMOS Berhad.
Bela datai Sapit Menteri Dagang Antarabangsa enggau Industri Malaysia, Datuk Chua Tee Yong.