Kastam Sarawak mujur ngerampas insap dibai belalai
KUCHING: Opis Kastam Diraja Malaysia ( JKDM) Sarawak ngerampas 4.3 juta batang insap ke dibai chara belalai di Pelabuhan Senari kena 4 Disember tu tadi.
Ketuai Direktor Kastam, Dato Sri Subromaniam Tholasy madah 430 kutak insap chap Rave disimpan dalam seiti kontena maya diperesa Bagi Penerit Adat JKDM Sarawak.
Subramaniam madah barang dagang nya dipadahka 660 kartun ai pemadam pengilap kukut enggau ai penuchi ba Sistem Maklumat Kastam (SMK).
“Asil pansik, opis Kastam tetemuka insap bechura putih chap Rave,” ku iya.
Iya mansutka penerang nya ba aum pengarang berita di Indu Opis JDKM Sarawak ditu,
Bela datai, Direktor Kastam Sarawak, Datin Sharifah Halimah Tuanku Taha.
Penyampau rampas nya ku iya dianggar urung RM390,000 ke alai rega chukai RM3.02 juta.
Iya nambah, rukuk nya dianjung ari Vietnam ke Indonesia tang singgah di Sarawak lalu pechaya insap nya ungkup makit di nengeri tu.
“Pemujur ngerampas rukuk ke dibai chara belalai nya ukai keterubah di Sarawak, tang ulah salah tu majak nyadi diatu,”ku iya.
Semua insap ke dirampas udah disita nengah Seksyen 114 Akta Kastam 1967.
Kes ditasat nengah Seksyen 135(1)(a) Akta Kastam 1967 ketegal ngimpot barang ke ditagang.
Iya meransang mensia mayuh meri kerejasama nyadung penerang ba sebarang pengawa salah ngagai JKDM.
“Kastam enda deka ngelakka pengawa mai barang tama chara belalai majak nyadi,”ku Subramaniam.