Raban nembiak anang sanggu belajarka adat, main asal
LUBOK ANTU: Raban nembiak rebak baru dilalau enda sanggu belajarka pekara ti bekaul enggau main asal tauka adat ke makin lenyau diserunyut pemansang.
“Main asal enggau adat dua pekara ti patut ditegika laban tu mih ti ngayanka identiti tetiap pupu bansa. Baka kitai bansa Iban ti ngembuan bemacham adat sereta main asal, endang engkeman endur kitai kelebih agi raban nembiak bela mansang belajarka pekara nya, laban diatu jeman pemansang teknologi pemadah enggau komunikasyen (ICT).
“Nengah pelajar sereta penemu ke diulih, tu ulih nyadika malin ungkup rebak baru ila lalu tu nentuka adat sereta main asal kitai enda lenyau diserunyut jeman,” ko pengari raban nembiak ari Krangan Mong Adriel Nyawai Robin lebuh ti ditanya maya ngulu pengawa Gawa Sandau Ari peranak rumah panjai nya, ditu, kena hari Enam tu tadi.
Lebuh ke ditanya bekaul enggau Gawa Sandau Ari, ko iya ngelansa tu entara gawa ti jarang digaga ba sekeda kandang endur. Berindik ari nya, nengah pekara tu, mensia mayuh patut beratika pekara tu enggau berat laban nangika mayuh agi adat tauka main asal bansa Iban lenyau pia aja.
Iya ke mega siku pengem- eran main asal, ngelalau raban nembiak ngambika ngena teknologi ungkup pemaik kededua pekara tu.
“Pemisi teknologi patut dikena enggau manah. Sekalika kitai ngena nya enggau mantai ke main asal, asil pengelandik jari asal, tauka adat ke agi dikembuan di kandang menua siku-siku. Pia mega, kitai ulih ngulihka penerang sentang pekara ti bekaul nengah laman web ke bisi.
“Berindik ari pekara tu, kitai randaka malin ti engkeman dikena nentuka adat sereta main asal kitai agi ditanka. Ambika banding, kitai nyangka nemu bida pua kumbu enggau kain ke bukai, tang buah sereta reti tauka ‘motif’ pua kumbu ngembuan mayuh reti sereta nama, nyadi sentang pekara tu, kitai enda patut nejuka pia aja,” ku iya nyemetak.