Bala staf KEMAS dipinta ransing agi bejalaika pengawa perintah
SRI AMAN: Bala staf Opis Pemansang Mensia Mayuh (KEMAS) di pelilih menua tu dipinta ransing agi gawaka pangku pengawa sida ti gawa perintah, pia ku Mohamad Zamri Mustajap.
Nitih ku iya, penegap kitai nyadi orang gawa perintah bepanggai ba pengepuh enggau pengeran ti deka ngasuh aktiviti enggau program diatur enggau mujur.
Iya mansutka jaku nya lebuh bejaku ba Program Begempuru Nanggam Pemanah Kaul Begulai Enggau Bala Staf KEMAS Sarawak Bagi Menua Sri Aman bepalan di Wisma Persekutuan Kejatau, Jalan Kejatau semak Sri Aman pagi kemari.
Ku iya, nyadi staf gawa perintah ba rintai mua, kitai patut ngenegapka pengandal diri nyadi siti gempung ti menyana.
Iya ngarapka pengawa nyirika iya nyadi Direktor KEMAS Sarawak ke baru, ulih bejalaika pangku pengawa besai begulai enggau semua sida ke gawa ngambika ulih ngenataika servis pemadu manah ngagai mensia mayuh kelebih agi komuniti menua pesisir di nengeri tu.
Kelimpah ari nya, ku iya nambah, bala staf KEMAS mega ditangkan ngambi bejalaika pangku pengawa ti udah dilempai enggau memanah enggau ngemeranka semangat kereja siti tim sereta seruran nitihka atur nyadi orang gawa perintah.
“Nyadi orang gawa perintah, kitai seruran ngingatka pangan diri ngambi nyaga ulah maya bekenaka media rama, kelebih agi facebook, whatsap enggau ke bukai.
“Anang sebarang mantaika ulah kitai ba media, kelebih agi media rama kemaya hari,” ku iya nyemetak.
Ku iya nampung silik agi, tetiap berita ti diterima kitai meseti belalauka pekara ti betul lalu tentuka berita nya udah diserenih dulu sebedau iya diterima nyadi berita.
Berebak enggau nya, iya mega bisi ngelimpangka awak diri berandau enggau 60 iku pengajar Tabika KEMAS Bagi Menua Sri Aman ba sebengkah program ke bukai ti diatur di Begunan Kompleks KOMTA, KEMAS Sri Aman.
Sama bisi datai, Pemantu Direktor KEMAS Sarawak, Joseph Unsong, Pemesai KEMAS Sri Aman, Josipah Sabas, Penyelia Kanan Parlimen Sarawak, Abang Mohd Daud sereta bala pemesai kanan KEMAS Sri Aman ke bukai.