Laban pengelenyau sesebengkah jaku deka nyadi siti penusah besai dalam sejarah pengidup mensia, bansa
KUCHING: Universiti Malaysia Sarawak (UNIMAS) sedia deka mantu ari sukut pengelandik nengah rintai pemansik ke bisi ba aktiviti mansik,nusun sereta naruh jaku asal di nengeri tu.
Mandal Canselor UNIMAS, Profesor Datuk Dr Mohamad Kadim Suaidi madah, pengelenyau tauka ‘pemati’ sesebengkah jaku, siti penusah besai dalam sejarah pengidup mensia laban nya deka punas enggau penemu, daya pengidup enggau sejarah ke beguna amat ba sesebengkah bansa.
“Nya alai, kita bebendar ngelaluka kerejasama ari raban luar baka Perintah Nengeri Sarawak, Dewan Bahasa dan Pustaka (DBP) sereta peribit mantu ari sukut belanja dikena mansik sereta ngenanka semua pengerembai jaku di nengeri tu.
“Kami di UNIMAS mega meransang pemansik entara universiti tu enggau universiti perintah sereta peribit ke bukai nyerungkai pengaya pesaka jaku Borneo, ke nyelai sereta berega. Kerejasama tu tentu ulih ngintu pesaka asal bansa kitai,” ku iya.
Iya bejaku munyi nya nengah teks jaku iya ke dibacha Dekan Fakulti Pelajar Jaku enggau Pelajar Komunikasyen (FPBPK) UNIMAS, Dr. Ambigapathy Pandian ba pengerami bejadika Simposium Jaku enggau Linguistik 2017 di UNIMAS di Kota Samarahan, kemari.
Mohammad Kadim mega mantaika pengirau ati iya bekaul rikod ‘National Geographic Society’ dalam ‘Endurign Voice Project’ ti madahka setengah ari 7,000 jaku di dunya tu deka punas ba taun 2100.
Nya alai ku iya, simposium tu endang engkeman amat endur bala pemansik enggau tebangkar berandau sereta ngelangkar, merambu lalu bejalaika chara ke pemadu manah dikena nentuka jaku ke bisi di borneo ulih ditanka.
Ku iya baru, UNIMAS endang seruran nemu penuduk Jaku Melayu, pinta guna Jaku Inggeris enggau jaku asal bukai ti enda tegap di Pulau Borneo.
“Nengah FPBPK, UNIMAS ukai semina ngaga pansik enggau nusun sereta naruh jaku asal di nengeri tu t ang mega muka kus jaku asal baka Dialek Melayu Sarawak, Jaku Iban, Bidayuh enggau Jaku Melanau.
“Nambahka nya, sekeda raban akademik UNIMAS bisi kaul enggau pengawa nusun sereta naruh nyengkaum ngaga diksyenari begulai enggau Dewan Bahasa dan Pustaka (DBP). Aku pechaya tu beguna amat nengah bidang ke dikaul UNIMAS dikena nyamin penegap mayuh bengkah ti ngachir di Bumi Kenyalang,” ku iya ba simposium ti keterubah endar diatur nya.
Sama bisi ngulu pengerami nya Direktor DBP Sarawak, Dr Hazami Jahari, Felo Utama Institut Kajian Etnik (KITA) Universiti Kebangsaan Malaysia, Profesor Dato’ Dr Teo Kok Seong, Presiden Gerempung Linguitik Malaysia, Profesor Dr Nor Hashimah Jalaluddin, bala Dekan,bala Sapit Dekan, bala Ketuai opis perintah enggau peribit.