Mayuh macam inisiatif transfomasyen udah dilangkar perintah ti ulih ngangkatka ekonomi digital di Sarawak, ku Abg Jo
KUCHING: Staf opis perintah ngembuan tanggungpengawa ti nadai banding pemar iya nya nyadi ke ‘tulang belakang’ Perintah sereta katalis ke berat dalam ngemunka pengawa transformasyen di menua tu kelebih agi ungkup nengeri Sarawak.
Kepala Menteri Datuk Patinggi Abang Johari Tun Openg madah, kededua pengereja pengawa Opis Perintah Nengeri enggau Perintah Besai (ti bepalan ba Sarawak) udah mujur bejalaika inisiatif transformesyen nengah Perambu Transformasyen Sarawak 10-20 lalu ba tikas Perintah Besai, Transformasi Nasional 2050 (TN50) enggau National Blue Ocean Strategy (NBOS).
Nya kebuah ku iya, iya mangku pengawa nyadi pemesai kanan dalam Opis Perintah di Sarawak, bejalaika pemerat pengawa sida ti bekait enggau inisiatif digital di menua tu.
“Sida bekerejasama enggau pemesai korporat ngangkatka ekonomi digital (DE). Enti pekara digital tu enda di pajakka, nadai transformasyen digital deka mujur,” ku Abang Johari.
Iya madah munyi nya lebuh bejaku ngemunka atur pengawa ‘ Hari Perkhidmatan Awam 2017’ sereta bejadika ‘Sarawak Multimedia Authority’ (SMA) ti digulu urung 5,000 penyereta staf ari opis sereta ejensi Perintah Nengeri enggau Perintah Besai (bepalan di Sarawak) di Palan Konvensyen Borneo Kuching (BCCK) ditu, ensana.
Abang Johari ti mega nyadi Menteri Wang enggau Perambu Ekonomi madahka DE Nengeri bisi empas ba tiap iku kitai, kelebih agi staf opis sereta ejensi perintah.
“Nya kebuah aku bejadika SMA seharitu, ngambika semua pengereja pengawa di Sarawak ngelala tauka nemu pemerat inisiatif digital tu.
“Nyangka kitai kala macha ba surat berita tauka ba laman web Perintah, tang kita deka nemu enggau silik agi pasal pekara tu seharitu, tauka meda pengawa pemandang ke bisi dipandangka ba lobi BCCK.
“Pengereja pengawa di opis perintah enda nyalah baka ‘tulang belakang’ Perintah, nya kebuah penemu kita pasal DE mega berat lebuh kita nerang pasal pekara tu ngagai nembiak redak kita,” ku iya.
Abang Johari ti mega nyadi Menteri Pemansang Mengeri enggau Rampa Menua nandu baru madahka pekara bekait enggau digital meri empas ngagai pemansang ekonomi, sereta pendiau rama kitai.
“Nya ukai semina suah ngachau sereta nyadi amang ba sida ke enda besedia nyambut teknologi baru tu, tang nyendiaka peluang ngagai orang bukai ke besedia nerima pekara baru tu.
“Nya alai, aku minta semua kita (pengereja pengawa opis perintah) sama nyingkang sereta niri negika integriti lebuh bejalaika pengawa kita,” ku iya.
Sebedau nya, Sekretari Perintah Nengeri, Tan Sri Datuk Amar Morshidi Abdul Ghani ba jaku iya madahka pengereja pengawa opis perintah nengeri tu, enda tau enda sama nyingkang nitihka empas transformasyen kemaya hari tu.
“Chara kitai bejalaika pengawa kitai, enda tau enda berubah, laban kitai napi rampa pengereja pengawa ke besemekih sereta singkang dunya ke majak nguing ngagai ubah tu.
“Chara kitai gawa diatu begunaka chara baru, ke enda sebaka enggau suba, baka empas ke baru sereta kompleks, ubah ke deras dalam teknologi, ke ngujungka rayat pan deka nemu pasal ubah tu enggau silik.
“Kapasiti kitai nimbal sereta mekuh ngagai kuasa ke enda tau enda tu, berat enti kitai majak nyadi relevan sereta meri pemerat ngagai servis ke rayat sereta betatika pemansang Sarawak,” ku iya.
Taja pia, kuing ngagai digital teknologi tu sigi udah dipungkal dalam taun 2010, nengah transformasyen pejalai pengawa di opis perintah di nengeri tu, kena nyukung agenda Perintah, ku iya.
“Nengah batang tuju agenda Perintah, menua tu deka nyapai pemisi ke besai manggai taun 2030, sereta ngurangka tikas bida pemisi nyengkaum ngemanahka agi pendiau rayat ke bekualiti.
“Pekara tu udah digaga nengah transformasyen sosioekonomi sereta transformasyen menua pesisir,” ku iya.
Ba lansa bukai, iya mega madahka Opis Perintah Menua tu bisi meri kelala SCS10-20 (Sarawak Civil Service) perambu transformesyen ke timpuh 2010 ngagai 2020, enggau pemerat nyapai Servis Kelas Dunya (WCS) ngagai rayat.
“Perintah Besai pan ngaga pengawa bansa nya, lalu meri kelala inisiatif transformasyen bukai, NBOS enggau GTP.
“Ejensi Opis Perintah Nengeri enggau Perintah Besai di Sarawak sama nyingkang ngemudika mayuh macham projek sereta program baka projek ngemansangka sekula ke udah lama tauka jai, mantu orang ke kena tasah, sereta kerejasama begempung ngemunaska pengawa bechurika kayu, sereta orang ke masuk ke menua tu ke enda nengah chara ke betul sereta sekeda penanggul bukai.
“Mayuh ari projek tu digaga sereta diperambu ba makmal baka High Performance Team (HPT) sereta inisiatif Key Focus Areas (KFA),” ku iya.
Taja pia, Sekretari Perintah Nengeri nya madahka, iya temegah ati laban pengereja pengawa di opis perintah di nengeri tu, besedia mekuh ngagai perambu transformesyen baruh SCS 10-20 sereta NBOS, enggau runding ke tebuka.
“Sida pan udah ngambi inisiatif ngaga perambu sereta ngamatka semua visyen Perintah Nengeri enggau Kepala Menteri,” ku iya.
Sama bisi enggau ngulu atur pengawa nya, Sapit Kepala Menteri Datuk Amar Douglas Uggah Embas, Menteri Pengawa Dagang Temuai, Seni, Adat Pesaka, Nembiak, Lumba enggau Main, Datuk Abdul Karim Rahman Hamzah, Menteri Pelajar, Sains, enggau Pansik Teknologi Dato Sri Michael Manyin anak Jawong, Menteri Opis Kandang Menua enggau Pengawa Berumah, Datuk Dr. Sim Kui Hian, Sekretari Perintah Besai (bepalan di Sarawak) Dato Mansor Man sereta sekeda pemesai bukai.
Ba atur pengawa nya, empat kategori di pasuk ke dalam lis Penerima Gelar Pegawai Contoh Perkhidmatan Awam Negeri Sarawak 2017, iya nya Kategori Pengurusan Tertinggi, Pengurusan Profesional, Pelaksana Sokongan 1 enggau II.
Penerima lis Perkhidmatan Awam Negeri Sarawak, Datu Jaul Samion (Sapit Sekretari Perintah Nengeri), Hamdan Sharbini (Pegawai Protokol dan Perhubungan Awam Negeri), Ngang Chung Sui ( Penolong Pegawai Sains, Lembaga Air Sibu) enggau Dennis anak Jakup (Pembantu Operasi N11, Opis Pelilih Menua Kanowit), lalu ari Perkhidmatan Persekutuan Negeri Sarawak, Dr. Jamilah Hashim ( JKNS), Roseline anak Batu (JPNS), Jamaludin Said (JPJ Sarawak), enggau Sallehen Rose (JKNS) sereta sekeda gelar bukai.
Ke taun tu, dua (2) kategori gelar dipekitka, iya nya Gelar Kepala Menteri Sarawak (Gelar Dwitahunan) enggau Gelar Ninting Taun.
Sida bekerejasama enggau pemesai korporat ngangkatka ekonomi digital (DE). Enti pekara digital tu enda di pajakka, nadai transformasyen digital deka mujur. Datuk Patinggi Abang Johari Tun Openg Kepala Menteri