Perintah nengeri deka ngenegapka strategi pemansang ekonomi
KUCHING: Ba aum Kunsil Nengeri (DUN) ke-18 ke baru udah digaga dalam bulan November tu tadi, perintah nengeri nadai pilih bukai tang negapka strategi pemansang, ngenyampatka penumbuh ekonomi napi empas ekonomi dunya.
Kepala Menteri Datuk Patinggi Abang Johari Tun Openg madah, pekara tu berat kelebih agi pemansut ekonomi digital (DE) ke dibai nengah empas ubah teknologi sereta pengangkat revolusyen digital.
“Bepelasarka pekara nya, perintah enda tau enda mekuh ngagai jeman baru digital sereta sama nyingkang enggau DE, ngambika kitai (Sarawak) enda kena tinggal di belakang, tang maju nyingkang ke mua baka menua bukai.
“Kitai udah ngaga sekeda ari strategi digital tu, kena ngiga peluang, inovasyen sereta meri pemerat ngagai semua pekara ti udah digaga.
“Ketegal nya, Sarawak udah ngemansangka lapan iti pekara ekonomi ungkup DE Sarawak, ke nyengkaum pegawa betanam betupi, ngasilka barang, dagang temuai, Bandaraya Pintar, pengerai digital, e-dagang, perintah gigital, lumba enggau main sereta seni enggau adat pesaka,” ku iya.
Lalu semua nya udah disukung ulih tujuh pengulih (enablers) ke nyengkaum Infrastruktur Digital, Pengelandik Digital, enggau pemansang bakat, Pansik enggau Pemansang, Inovasi Digital enggau Pengawa Dagang, Digital enggau Data, Pengelikun Siber enggau Digital Inclusivity,
“Pemisi strategi enggau perambu pengawa ke silik, aku pechaya pemansang DE kitai mansang nuju ngagai jalai ke betul,” ku iya.
Abang Johari madah munyi nya lebuh bejaku ngemunka atur pengawa ‘Hari Perkhidmatan Awam 2017’ sereta bejadika ‘Sarawak Multimedia Authority’ (SMA)ti digulu urung 5,000 penyereta pengereja pengawa ari opis Perintah Nengeri enggau Perintah Besai (bepalan di Sarawak) di Palan Konvensyen Borneo Kuching (BCCK) ditu, kilah ensana.
Abang Johari ti mega nyadi Menteri Wang enggau Perambu Ekonomi nandu baru madahka dalam Strategi DE Sarawak 20182022, bisi nerang pasal DE sereta sistem ke berat ke ulih alai ekonomi Sarawak mansang sereta nyadi tuai di Sarawak.
“Iya madahka reti struktur institutional, (governance), enggau infrastruktur digital ke deka disediaka ngambika bisi alai orang bedagang sereta industri bejalaika pengawa sida iya sereta mansang dalam DE Sarawak,” ku iya.
Ba lansa bukai, ordinan Opis Penguasa Multimedia Sarawak (SMA) baru udah dikemendarka ba aum Kunsil Nengeri kena 8 November tu tadi.
Nengah pemisi ordinan nya ku Abang Johari, SMA udah nyadi sebuah entiti opis bekuasa dalam menua tu ke beratika komunikasyen enggau multimedia.
“Nitihka ordinan nya, SMA nyadi sebuah gerempung ke megai kuasa kediri empu sereta bekuasa meri pemendar nyengkaum pengulih nyaman sereta kena saman; ngambi, bempu, megai, nyuwa tauka nyual reta tanah nya nitihka atur undang-undang,” ku iya.
SMA betuaika Kepala Menteri ke nyadi chairman opis nya lalu dibantu ulih raban (lembaga pengarah).
“Pengawa SMA iya nya nyadi penyanding penemu ngagai Perintah Menua Sarawak ba pekara bekait enggau pemerat polisi ke komunikesyen, sereta pengawa multimedia; ngaga sereta bejalaika atur kuasa ungkup undang- undang tauka berundingka nyadang ubah ba undang-undang nengeri bekait enggau komunikasyen enggau multimedia,” ku iya.
Abang Johari ti mega nyadi Menteri Pemansang Mengeri enggau Rampa Menua nandu baru madahka SMA bisi kuasa madu komiti opis nya, ngaga kerejasama enggau kompeni, ngatur pengawa begulai sereta pengawa bukai ke bisi bekait enggau pengawa nya.
“SMA deka nyendiaka polisi lalu SDEC deka beratika endur ti patut diperatika DE Sarawak ke nyengkaum infrastruktur digital, pengelikun siber, pemansang bakat, e- dagang, pansik enggau pemansang dalam teknologi digital, orang dagang inovasyen digital sereta Perintah Digital.
“Pengawa SMA dalam kandang opis perintah/ijinsi nyadi palan (one stop centre) ke komunikesyen enggau pengawa multimedia di menua tu nitihka ungkup undang- undang Ordinan sereta atur undang-undang menua tu,” ku iya.