Abang Johari agi nyadi Tuai PBB Pampang Satok
KUCHING: Ba atur pengawa Aum Gempuru Wakil Pergerakan Pemuda Parti Pesaka Bumiputera (PBB) pampang N8 Satok Sesi 2013-2017 (aum Tiga Taun Sekali) ke ngena jaku rambai ‘PBB Satok Mendokong Sarawak Digital’ di sebengkah hotel ditu, kemari beratika resolusyen pangku pengawa Tuai Parti Pesaka Bumiputera Bersatu (PBB) enda diperebut, alai penuduk nya dipenggi Kepala Menteri Datuk Patinggi Abang Johari Tun Openg.
Lalu nya mega nyengkaum pangku pengawa Sapit Tuai PBB pampang Satok bela agi ditanka.
Abang Johari ti mega nyadi chairman Barisan Nasional (BN) Nengeri meri terima kasih ngagai semua penyereta ari sitak Satok ke agi milih iya ngetanka penuduk Tuai PBBSatok ditu, kilah ensanus.
Ba pemansang berindik ari nya, iya madah mangku pengawa nyadi Kepala Menteri, nganti endur niang Pehin Sri Adenan Satem ke midang pun taun tu tadi, iya deka majakka pengawa niang ke udah di (amanah) ngagai iya.
“Ari latih ke diberi ngagai kami duai (nyengkaum Sapit Kepala Menteri Datuk Amar Douglas Uggah anak Embas), aku nadai penanggul nyambung pengawa ke udah digaga niang Adenan.
“Ke berat iya nya kitai enda tau enda malik ke mua sereta napi jeman ke seruran berubah.
“Jeman Kepala Menteri Tun Abdul Rahman Yakub suba enda sebaka, lalu baka nya mega enggau maya Pehin Sri Abdul Taib Mahmud pan enda sebaka, prasarana ekosistem pan enda sebaka, lalu baka nya mega enggau maya niang Adenan, pengawa ke digaga iya negapka agi ekosistem kitai ngambika Sarawak ulih ngambi pulai baru pekara ke disemaya dalam Danji Malaysia 1963 (MA1963),” ku iya.
Kediatu ku iya, pengawa ke udah digaga semua ex-Kepala Menteri endang dipajakka kelebih agi lebuh gaya baka kediatu, jauh berubah ketegal teknologi ke besai.
“Enti kita berandau enggau orang di mengeri tauka di menua pesisir, nadai orang nanya pekara baka kelia, ke betanyaka jalai, jematan sereta infrastruktur bukai, tang orang nanya, bakani ku gaya jemah ila, enti kitai ulih nyadi sebuah menua ke maju tauka enda.
“Mayuh rebak baru baka kediatu, ke pansut ari universiti, teulihka pengawa tauka enda, tauka sida iya bulih pengawa ke besai ke ulih (menyumbang) pemansang menua, nya utai ke ditanya ke pengabis berat.
“Laban penanggul pasal pemujur tu, enti kitai mujur laban universiti, ulih ke enda ekosistem nya dikena, nya utai ke ditanya orang tekala tu,” ku iya.
Abang Johari ti mega nyadi presiden PBB nandu baru madahka di PBB, chara orang tuai ke bepeneleba bechampur enggau nembiak rebak baru ke regas sereta ngembuan pengelandik tau nyadi ‘resipi’ ke manah, ke ulih ngangkatka parti sereta menua tu.
“Orang lama/baru, orang tuai ke bepeneleba mesti ngambi sida ke nembiak, ke ngembuan pelajar ke tinggi, nyerumba ‘resipi’. Tu chara kitai ngemansangka menua tu, sida rebak baru ke ngembuan pengelandik, pendiau sida iya, nyad resipi ke betul, setengah utai ke digulai kitai nya bechampur, orang tuai enggau nembiak,” ku iya.
Nya alai, ku iya, rebak baru mesti diberi jalai laban sida tu ila meh ke deka nganti orang kediatu lalu majakka pengawa sida ke udah.
“Reti nya sida ke nembiak diberi tanggungpengawa, laban sida tu ke nyadi orang ti nampung pengawa kitai.
“Sida ke megai kuasa enda tau enda ngelatih sida ke biak agi. Nengeri kitai ngembuan mayuh macham pupu bansa sereta pengarap, lalu tu ukai pekara ke muntang,” ku iya.
Abang Johari ti mega nyadi ADUN Satok nandu baru madahka, PBB iya nya parti ke ditusun enggau manah, lalu naka kediatu, timbal ke diterima ari semua ranting sereta pampang meri timbal ke manah kelebih agi dalam ngubah ekonomi menua tu nuju ekonomi digital.
“Naka kediatu, timbal ke diterima positif endar, kelebih agi ari kaban baru parti nyengkaum ari komuniti. Sida sigi nganti ubah tu nuju Ekonomi Digital (DE),” ku iya.
Sama bisi enggau ngulu atur pengawa nya, bini Kepala Menteri, Datin Patinggi Dato Juma’ani Tunku Bujang, Sapit Ketuai Pampang PBB Satok, Ibrahim Baki, ADUN Muara Tuang ti mega pemesai PBB Datuk Idris Buang.