Teknologi gadung ari menua China nyadika chunto ti engkeman
KUCHING: Perintah nengeri majakka atur ngenan pemaik rampa menua bepelasarka teknologi gadung ari menua China.
Nadai sebun enggau kersik, semina langit biru ti terang di Beijing. China udah mandangka komitmen ba atur ngenan pemaik rampa menua. Datuk Patinggi Abang Johari Tun Openg Kepala Menteri
Kepala Menteri Datuk Patinggi Abang Johari Tun Openg madah penemuai deligasyen iya ke Beijing, China ba minggu ke udah temegahka pengeran China ngintu pemanah ikas angin (udara).
“Nadai sebun enggau kersik, semina langit biru ti terang di Beijing. China udah mandangka komitmen ba atur ngenan pemaik rampa menua,” ku iya.
Iya mansutka jaku nya ba makai lemai ngerami pemindah Konsul Jeneral Republik Rakyat China di Kuching, Fu Jijun sereta bini Liu Sha di Hotel Imperial malam ensanus.
Abang Johari madah Sarawak mayuh belajar ari China ba sentang atur ngintu pemaik rampa menua ti ngujungka perintah bejalaika polisi ekonomi digital.
Ku iya, ba seiti aum internet ke diatur di China bedau lama tu tadi mandangka menua nya nagit nyapai Keluaran Dalam Negara Kasar (KDNK) 55 peratus manggai ba taun 2021 nengah ekonomi digital.
Ba 2016, ekonomi digital di China ku abang Johari ngenataika 35 peratus KDNK iya nya ba penyampau USD3.43 trilion.
“Ekonomi digital seiti jalai menua China mansang ke mua ke mega nyadi jalai ungkup kitai ngerembai ekonomi ditu,” ku iya seraya madah atur nya deka nempa pengawa puang ke baru ungkup raban nembiak.
Seiti agi pekara sentang rampa menua ti dikemerat kitai iya nya ba pekara bas hidrogen di Kuching.
Iya madah menua Jerman enggau China udah mujur nyingkang ba pekara teknologi lalu nempa pemujur ke sama ba atur nguna gas hidrogen.
“Ketegal nya Sarawak mutus nitihka singkang China. Ungkus numbuhka gudang mansutka hidrogen enda besai lalu kitai ulih mai hidrogen ke Sarawak,” ku iya.
Bela datai bini Kepala Menteri, Datin Patinggi Dato Juma’ani Tuanku Bujang, ExSapit Kepala Menteri Datuk Patinggi Tan Sri George Chan Hong Nam, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah sereta Menteri Opis Kunsil Kandang Menua enggau Berumah Datuk Dr Sim Kui Hian.