Di nengeri tu, pekara ti mayuh nyadi iya nya bekaul enggau hak tanah sereta dokumen pengelala, ku Francis
KOTA SAMARAHAN: Penanggul bekait enggau hak asasi manusia ukai penanggul ti berat di Sarawak, tang semina napi penanggul mimit ba pekara bekait enggau kad pengelala, surat beranak tauka bekaul enggau nyadi rayat menua tu.
Pesuruhjaya Suruhanjaya Hak Asasi Manusia Malaysia (SUHAKAM), Francis Johen madah taja pan di Sarawak, penanggul bekait enggau hak asasi manusia nya ukai penanggul ke berat tang kitai enda tau enda bejejaga.
Taja pia, penanggul bekait enggau hak asasi manusia di menua tu enda nambah, laban enti bisi kes nya deka diputar polis sereta ejensi bekaul enggau lengkas.
“Baka di Sarawak, penanggul bekait enggau hak asasi manusia mayuh besangkut paut enggau penanggul pasal hak tanah adat Bumiputera, hak rayat menua tu ke nadai ngembuan kad pengelala (IC) tauka surat beranak.
“Enti anak mit ke ada lalu indai iya ukai rayat menua tu, tang laki iya orang Sarawak, lalu tikah enda di rejista, nembiak ke ada nya enda ulih diterima nyadi rayat di menua tu.
“Laban ari sukut undangundang, anak mit nya beindaika orang ke ukai rayat menua tu, ke enda nikah (nitihka atur undang-undang menua tu), reti nya anak mit ke ada nya nitihka indai iya,” ku Francis.
Iya madah munyi lebuh dikerandau pengudah bejaku ba forum hak asasi manusia di Palan Islam Tun Salahudin, UNIMAS ditu, kemari.
Francis mega nyemaka anak mit ke ada nya (ke bedau ditetapka nyadi rayat menua tu) agi diau di Sarawak, tang udah nya di iru orang ari menua tu, enda ulih terus nyadi rayat ditu laban enda nitihka atur undang-undang menua tu.
“Ordinan Ngiru di Sarawak, madahka enti anak nya di iru, enda tau enda bisi kaul enggau orang ditu, ke ada di menua tu, tauka apai tauka indai nembiak nya mesti orang Sarawak.
“Kadang- kadang orang melaki bini ari menua tu udah ngiru anak mit nya (ke bedau diputuska nyadi rayat menua tu) lalu mai nembiak nya diau enggau sida iya, tang enti penanggul nya enda diputarka, nembiak nya nyangka agi ulih diau ditu, tang dokumen deka nyadi rayat menua tu enda tau enda digaga,” ku iya.
Penanggul anak mit nya enti end dikemutar enggau jampat, deka napi penanggul bukai baka sekula, sepital tauka palan berubat sereta endur bukai laban ketegal status nembiak nya bedau ditukar.
“Kami sigi bisi komiti khas bechairmanka SUHAKAM mutarka pekara tu. Kami mantu ngaga surat sukung, mantu ruang bilik ke napi penanggul nya nyengkaum mantu ijinsi bukai.
“Amat nya di Sarawak, penanggul tu nadai mai empas ke besai di Sarawak, tang penanggul ke mit bansa nya bisi empas ba anak mit nya enti sida besai jemah ila,” ku iya.
Ba lansa bukai, Francis madah nyangka dalam pekara undang-undang ngiru anak mit bansa tu mai empas ke besai ngagai orang menua tu ke ngiru, nyangka Perintah ulih mansik baru undangundang baka Ordinan Ngiru Anak Mit ulih dipansik sereta digaga baru.
“Atur kuasa nya berat laban nyaga hak Sarawak bekait enggau ngiru anak di Sarawak.
“Bepanggai ba perintah nengeri mansik baru undangundang ke bisi diatu, tauka atur kuasa ke bisi diatu sereta bakani deka ngemutarka penanggul nya,” ku iya lalu nandu baru ijinsi bukai ke bisi bekait enggau pekara tu pan bisi atur sida iya empu.
Ba atur pengawa nya kemari bela digulu ulih nembiak UNIMAS ari Fakulti Sains Sosial, lalu siku pensyarah ari fakulti nya, Prof Aisha Bidin bela bisi bejaku pasal nembiak enggau hak asasi manusia ke digaga beserimbai enggau Hari Hak Asasi Manusia ke di intu kena 10 Disember tu tadi.
Baka di Sarawak, penanggul bekait enggau hak asasi manusia mayuh besangkut paut enggau penanggul pasal hak tanah adat Bumiputera, hak rayat menua tu ke nadai ngembuan kad pengelala (IC) tauka surat beranak. Francis Johen Pesuruhjaya SUHAKAM