800 pesalah makai suap udah dilis ba ‘website’ SPRM
MIRI: Pengawa numbuhka penerang pesalah makai suap di website Komiti Nagang Pengawa Makai Suap Malaysia (SPRM) udah ngelis urung 800 nama pesalah makai suap.
Pengawa numbuhka penerang tu nyadi siti ari penyapai ba inisiatif SPRM ngemunas penyalah makai suap.
Direktor SPRM Sarawak Dato’ Badrul Shah Norman madah bemacham inisatif ke bukai agi dipejalai nyengkaum pejalai atur idar kereja ngagai sida enggau tanggungpengawa ke dikumbai ‘hot spot’.
“Berebak enggau nya, SPRM mega bisi ngelanchar kimpin ngemunaska penyalah makai suap ti diberi nama 3J iya nya ‘Jangan Hulur, Jangan Kawtim dan Jangan Settle’.
“Tuju kimpin tu ngambika rayat sedar lalu enda ngaul diri ba ulah makai suap enggau salah guna kuasa nengah chara nerima tauka meri suap,” ku iya.
Iya mansutka jaku nya dalam jaku dipansutka iya rambau Pengawa Nyain Ikrar Bebas Rasuah (IBR) Ungkup Bala Pemesai enggau Staf Lembaga Kemajuan Ikan Malaysia (LKIM) Wilayah III Miri di sebengkah hotel tebilang ditu, kemari.
Jaku iya dibacha pengari iya Penguasa SPRM Cawangan Miri Ayahtullah Abdula Humair.
Sama bisi datai Direktor Unit Integriti LKIM Azmi Othman, Penulung Pemesai Kanan Unit Integriti LKIM Noorazmi Md Ariffin enggau Pemesai LKIM Wilayah III Miri Saliah Mudin.
Ba lansa ke bukai, iya meri jaku puji ngagai raban pengatur pengawa LKIM Wilayah III Miri laban udah nangkup peminta SPRM enggau bejalaika inisiatif nyain IBR.
Kenu ku iya, inisiatif tu nyadi pengeran raban LKIM Wilayah III Miri ba pengawa mantu SPRM ngemunaska penyalah makai suap dalam ejensi nya empu.
“Kitai enggaika servis perintah kamah enggau ulah makai suap ke alai pemesai kana dipeda idup senang ngelui ari penatai pemisi sereta ngumpul reta nengah ulah ti salah, makai suap, laban ulah tu tau ngamahka nama semua orang gawa perintah.
“Kitai patut besaup nentuka tetiap iku kitai ngesan tanggungpengawa ramam enggau pemanah ulah ngagai diri empu, komuniti enggau menua. Arapka pengawa kitai ngemunaska makai suap ulih nempa rampa bibas makai suap di Malaysia,” ku iya.
Berebak enggau pengawa nya, bisi 43 pemesai enggau staf LKIM Wilayah III Miri udah macha sumpah IBR diketuai Pemesai LKIM Wilayah III nya empu, iya nya Saliah.