Dr James Chella ngembuan pengelebih ba chara ngaul diri enggau komuniti
SARATOK: Pejalai politik Dr James Chella iya ke ngembuan juluk ati deka bediri ba P.205 Saratok maya Pengawa Bepilih Besai Ke-14 (PRU14) ngena tikit Barisan Nasional ( BN) dichura iya enggau macham chara ti tau dipadah bisi penyelai tang ngembuan pengelebih.
Chara iya tu mayuh bida enggau chara ke dikemeran raban politik ke bukai ti ngembuan juluk ati ke sebaka tiap maya sebedau pengawa bepilih nyadi.
Ngelama tu, tebal agi raban politik bekenaka chara betikika rumah panjai betemu enggau rayat ngambika berupai ayan dipeda ketuai parti bulih sukung ari rayat sebedau dipilih nyadi chalun.
Tang ba Dr James, iya ti mega siku ari raban Parti Progresif Demokratik (PDP), iya rindu ngatur program ke tau dikena iya nyaup ngelempung tating pengidup rayat enggau chara ke dipeda iya ti ulih mai penguntung ngagai rayat empu nyengkaum pengawa ti tau nyintalka agi kaul rayat enggau pangan diri.
Ambika banding sebedau tu, iya udah beberapa kali ngatur pengawa betutus ungkup bala nembiak enggau enda bebayar baka ba menua Nanga Risau di Awik, Nyabor di Roban lalu empai lama tu tadi iya bisi ngatur program ke sebaka ba Librari Saratok.
Maya tu mega, Dr James benung kiruh begulai enggau peranak rumah panjai ari Krian enggau Awik kelimpah Debak, Roban enggau Betong besaup nembuka tiga buah perau lumba kayuh.
Iya ngaga perau tu ngambika ulih dikena rayat tunga kia bela ngambi bagi ba Regata Saratok ke disadang deka diatur ujung taun tu.
Pengawa iya tu bela nejuka pejalai politik iya macham agi linsu sereta chura ari chara ke dikemeran sida ke bukai tiap maya jam ngangkatka diri deka nyadi chalun baikka ari penyakal tauka parti perintah.
Tim lumba kayuh tu digaga iya empu ngena nama T.J.C lalu iya ngandalka Ketuai Sekretari PDP P.205 Saratok Kaunsilor Noel Tom nyadi ketuai tim sida kelimpah disaup Sapit Sekretari PDP Saratok, Bunyau Kasa.
Kelimpah ari nya, iya pechayaka pengelandik Tuai Rumah Bajing ari Lubuk Renit, Krian ngeban tiga buah perau tim iya ngena kayu Engkabang.
Tuai Rumah tu endang lama udah tebilang landik ngaga perau kayuh tunga pelilih Saratok.
Sebuah ke udah tembu digagaka Dr James enggau nama Endun Lenja.
“Ukai semina deka enggau ngambi bagi ba pekit tang ba aku pengawa tu tau bendar ngempung rayat lalu nempa kaul ke manah ba sida iya empu.
“Seraya nya, aku ngarapka bala mayuh ti enggau tim aku deka mujur ba pekit tu ila,” pia ku iya maya berandau enggau pengarang berita, kemari.
Dr James mega madah, tu keterubah iya, iya empu enggau bini iya Dr Cindy Mason numbuhka tim ngambi bagi ba pekit lumba kayuh ba Regata Saratok.
Nambahka nya, ku iya, lumba kayuh tu endang pekit ke dikerindu rayat nengeri tu ari menya, kenyau agi dipegai perintah Brooke suba.
Ari nya iya meda, lumba tu ukai semina nyadika pekit aja tang nyadika platform negut kaul rayat.
Agi bekenangka chara politik iya nya, ku iya, iya agi ngering penemu madahka lumba nya engkeman bendar nyadi menalan alai rayat begulai enggau pangan diri ngelawa tuju nempa penyerakup nyeliahka ulah enggai bepeda pangan diri sebedau penemu sida nyadi segala.
Taja pia iya madah, sebuah ari perau digagaka enggau nama Endu Lenja ngangkatka nama niang ipar iya ti empai lama udah nadai.
“Agi idup suba, niang kala bemimpi meda aku bisi sebuah perau kayuh.
“Ari mimpi iya nya aku lalu teulihka runding ngaga perau kayuh tu lalu mutus begulai enggau rayat ditu ngambi bagi ba pekit lumba kayuh maya Regata Saratok ti deka datai,” ku iya madah terang.
Kelimpah ari nya, iya pechaya ulah iya tu deka ngamatka mimpi enggau pengandal niang ipar iya ti deka meda iya bisi perau lumba kayuh kediri empu.
Tiga buah perau kayuh Dr James tu ila dikayuh 90 iku sereta udah ditentuka deka besemekih enggau pemekit bukai ba kategori sakai.