Chalun DAP ungkup PRU14 diaudit, disarap, ku Chong
KUCHING: Parti Tindakan Demokratik (DAP) Sarawak bejalaika pengawa audit enggau nyarap chalun ti deka bediri minta pilih ba Pengawa Bepilih Besai (PRU) Ke-14 ke deka datai.
Chairman parti nya, Chong Chieng Jen madahka ba pengawa milih chalun, DAP lebih ngemeratka pengulih enggau penyanggup chalun bediri minta pilih sereta gawa nyadi pengari rayat penyakal.
“Pengulih, penau enggau penyanggup chalun tu disarap ninting hari ti mungkur penyulut enggau pemendar gawa. Naka ke diatu, chalun kitai nadai penanggul.
“DAP Sarawak kelebih agi ngembuan chara kediri empu nyarap sereta nentuka bagi chalun kami,” ku iya ba aum pengarang berita ba Indu Opis DAP nengeri ditu kemari.
Chong ti mega Kaban Parlimen Bandar Kuching enggau Kaban Kunsil Nengeri ( ADUN) Kota Sentosa, madahka enda ulih ngena kes ADUN Pujut Dr Ting Tiong Choon maya beratika chara DAP milih chalun.
“Kes Pujut ( Dr Ting) lebih ngagai undang- undang ti enda nyegenda tang iya udah ngereja iya eng- gau naka pemanah baka ti dikearapka, gawa bebendar, dedikasi berengkah ari ke dipilih nyadi pengari rayat nyentuk ke diatu.
“Sekalika iya ulih nyadi ADUN laban bisi dua peranak menua sebedau tu, awakka kort ngaga pemutus. Tambah mega nadai undang-undang ti nyengala pasal pekara tu,” ku iya.
Chong mega enda ngenggai engka enchalunka ADUN ari parti nya bediri minta pilih ba PRU Ke-14 ke deka datai ketegal sekeda faktor.
Taja pia ku iya, semua nya bepanggai ba gaya ke diatu enggau guna.
“Laban mayuh ti enggai datai ke mua nyadi chalun penyakal ketegal nya mungkur mayuh pengorbanan sereta tuduh ke sedia nganti.
“Kekadang kitai nadai pilih bukai kelimpah ari megai dua pangku pengawa dalam siti timpuh...tebal agi pemesai kami (DAP) megai dua pengawa lalu sida betapi enggau mayuh tuduh politik baka aku,” ku iya.
Ngenang pasal penyikap DAP Sarawak betapi enggau PRU Ke-14, Chong ma- dahka chalun udah ditetapka tang enda dipadah dulu laban agi ke lalu tumu.
“Kami (DAP Sarawak) seruran sedia napi PRU Ke-14. Rintai nama chalun mega udah ditetapka.
“Perambu tumu baka ke ngelama tu kelebih agi ba penyampau sitak ke deka diperebutka agi baka PRU Ke-13,” ku iya.
Ba PRU Ke- 13 ( 2013) DAP bediri minta pilih ba 10 sitak iya nya Mas Gading, Bandar Kuching, Stampin, Serian, Sarikei, Sibu, Mukah, Kapit, Bintulu enggau Lawas.