Ngambika sida ulih nerang ngagai nembiak redak bekaul pemaik sereta program pemansang ti disediaka perintah
KAPIT: Kaban Kunsil Nengeri (ADUN) Pelagus Wilson Nyabong Ijang ngelalau bala ketuai komuniti meseti meretika polisi enggau program pemansang perintah ngambika sida ulih nerang ngagai nembiak redak ari baruh pegai sida.
“Dalam jeman baru tu, dikena nentuka kita ulih bejalaika tanggungpengawa enggau meruan, bala ketuai komuniti meseti meretika polisi enggau pemansang perintah ngambika kita ulih nerang enggau silik ngagai bala nembiak redak ti dipegai kita.
“Nya kebuah beguna endar ngemeranka ulah deka belajar. Tetapka tetiap pengawa ngulu aktiviti diatur Opis Pelilih ngambika kita seruran nemu isu ke nyadi kemaya hari.
“Enti sema kita enda nemu, betanya ngagai orang bukai tauka ngelawa bala pemesai di Opis Pelilih ngambika kita seruran dipadah,” ku Nyabong.
“Kitai diatu benung nyingkang ngagai jeman baru Sistem Ngenatai Servis Perintah enggau Ekonomi Digital, bala ketuai komuniti nyadi jematan ti nyambung entara perintah enggau rayat di menua.
“Nya alai kitai meseti ulih nguasa pengelandik pemun Teknologi Pemadah enggau Arus Penyambung (ICT) ba pengawa besehari sehari,” ku Nyabong nambah lebuh bejadika Pengerami Gempuru Hari Besai ke diatur di Sri Kapit, Jalai Puan Sri Tiong apin lama ke udah, ke diatur Serakup Bala Ketuai Komuniti Dayak Bagi Menua Kapit bekerejasama enggau Opis Pelilih Kapit.
Dulu agi ari nya, bisi 220 iku ketuai komuniti (Temenggong, Pemanca, Penghulu, Ketuai Genturung Pendiau, Kapitan, Tuai Rumah) udah ngulu Kus Nyadi Ketuai enggau Ketuai Komunitin sehari nyentuk diatur Opis Pelilih Kapit di Bilik Konferen opis nya, berindik ari pengawa bejalaika Indeks Penyulut Pengawa (KPI) ungkup bala ketuai komuniti di Pelilih Kapit.
Nyabong muji Opis Pelilih Kapit ti udah mujur ngatur kus sereta nerima timbal chukup manah ari bala pe- sereta ke datai ari bala ketuai komuniti.
“Enda lama agi, Kapit deka disambung nengah darat. Jematan Baleh udah tembu, Jalai Kapit-Song-Kanowit ti digaga Perintah Besai, Jalai Mujong-Putai ngelawa Tekat Ai Baleh ke digaga Perintah Nengeri, Jalai Nanga MeritSangan-Tatau, Jalai Belaga ngagai Nanga Merit digaga di baruh projek Jiwa Murni sereta pengawa ngaga Jalai Hubung Desa ti nyambung rumah panjai ngagai jalai besai ngemuntang sereta pengangkut ke meruan agi.
Ari jalai tu, perambu ngemansangka tanah dikena ngenyemakka takah aktiviti ekonomi ngambi nyungkak ekonomi ulih dipejalai,” ku Nyabong nerang.
Ngelansa pasal gempuru hari besai nya, Nyabong meri puji madahka nya aktiviti chukup manah ngempuruka semua bala ketuai komuniti bela ngaul diri sereta bekunsika penerang enggau penemu enggau pangan diri.
Sama bisi datai Pemesai Pelilih Elvis Didit, Pemesai Ngatur Pengawa Anyie Awing, Wan Mohd Shukri enggau Robert Anyaw, Ketuai Kerani Opis Pelilih Kapit James Sandak, Temenggong Wilfred Billy Panyau, Pemancha Enggin Nyipa, Pemanca Yong Thu Fook, penghulu Haji Abang Hamzah Bolhassan, Penghulu Esit Nalo, Penghulu Pasang Tubah, Penghulu Madang Jelaini, Penghulu Wong Kie INg sereta bala bukai.
Dalam jeman baru tu, dikena nentuka kita ulih bejalaika tanggungpengawa enggau meruan, bala ketuai komuniti meseti meretika polisi enggau pemansang perintah ngambika kita ulih nerang enggau silik ngagai bala nembiak redak ti dipegai kita. Wilson Nyabong Ijang ADUN Pelagus