Kimpin Pengelikun Jalai Kapit udah dipenyadi nyerumba Krismas, Taun Baru

KAPIT: Residen Kapit Joseph Belayong udah ngelancharka Kimpin Pengelikun Jalai Bagi Menua Kapit ba mua Palan Penyangkai Kapit, kena Hari Dua.

Kimpin pengelikun ke diatur Komiti Pengelikun Jalai Kapit udah disereta mayuh bengkah ejensi perintah sereta bala ketuai komuniti.

Rambau kimpin nya, bisi 22 iti helmet udah disadung ngagai sida bekenaka mutosikal.

Berindik ari pengawa nyadung helmet enggau nadai bebayar ungkup kimpin pengelikun nya, bisi seratus iku sida bekenaka mutusikal udah nganti urung pukul 8 pagi.

Sida betubuh 20 iku mujur nerima helmet seraya bala bukai nerima kereban pengelikun jalai enggau pamphlet.

Ku Joseph Belayong, kimpin nya diatur nyerumba pengawa ngintu Krismas enggau Taun Baru ke deka datai, ti berambai jaku ‘ kemeratka pengelikun maya deriba ngambika datai di rumah’.

“Kimpin tu nyadi aktiviti tetiap taun nyerumba pengerami ngintu Krismas enggau Taun Baru.

“Kitai melebaka mayuh agi perengka pengangkut deka datai ngagai Kapit ungkup kemisi hari besai enggau kemisi ninting taun.

“Aku ngelalau kita deriba enggau likun nyentukka datai ba rumah. Anang deriba enti mabuk. Pekara pengelikun patut dikemerat.

“Enti nyema pejalai jauh, peresa dulu injin nentuka nadai penanggul ti tau ngeruga pejalai sereta bisi lisin ti sah,” ku Joseph ngelalau.

Sama bisi datai Pemesai Pelilih Bukit Mabong Douglas Pungga, bala pemesai Opis Residen Kapit; Belayong Pok, Rolyn Terrance enggau Anwar Fakhriyuddin, Pemesai Pengatur Pengawa Opis Pelilih Kapit; Anyie Awing enggau Wan Mohd Shukri, Pemesai Ngatur Pejalai Trafik enggau Mensia Mayuh ASP Fauzan Kassiim, Sekretario Opis Pelilih Kapit Jabang Juntan, Pemesai BOMBA Irwandy Tugor, Temenggong Wilfred Billy Pangau, Penghulu Haji Abang Hamzah Bolhassan sereta bala bukai.