Sebarang pemutus digaga ketuai tinggi parti dipebasa
KUCHING: Kaban Parlimen (MP) Santubong, Datuk Seri Wan Junaidi Tuanku Jaafar sigi enda ngansak bala ketuai tetinggi Barisan Nasional (BN) meri iya dichalunka baru maya Pengawa Bepilih Besai Ke-14 (PRU14) ila.
“Aku meruan enggau penetap diri, kenyau ari keterubah dichalun dalam taun 1990 ba penuduk Parlimen Batang Lupar, ke alai aku bediri minta pilih maya diasuh.
“Pia mega, nyema aku badu agi diasuh bediri, aku sigi enda bediri laban tu nadai nanggul aku,” ku iya.
Iya mansutka jaku nya lebuh bejaku ba Pengawa Nyuaka Geran Projek Mit Pemansang Menua Pesisir (MRP) enggau Pengerami Makai Lemai ungkup Parlimen Santubong di sebengkah hotel ditu, malam kemari.
Pia mega ku Wan Junaidi ke lalu nyadi Menteri Pengeraja Asal enggau Rampa Menua, taja majoriti rayat ba renggat baruh nyukung iya dichalunka baru di Santubong, tang pemutus bepanggai ba jari bala ketuai tetinggi parti.
“Sebarang pemutus ti deka digaga bala ketuai tetinggi parti ila, aku tetap nerima, bebasa sereta nurut.
“Tang nyadi siku menteri enggau ketuai kanan, enda disangkal ke alai aku bisi mayuh agi kapasiti sereta peneleba dibanding orang baru,” ku iya.
Ba lansa bukai, Pemancha Rashidi Junai dalam jaku dipansutka iya madahka nyauka semua bala ketuai komuniti di Santubong agi keranka Wan Junaidi dichalunka baru maya PRU14.
Kebuah pia, semua pemansang sekalika udah, benung tauka deka dipejalai di sitak nya, semua lanchar nitihka perambu.
Nya kebuah iya ngarika bala ketuai renggat baruh di Santubong netapka penemu minta Wan Junaidi dichalunka baru maya PRU14 ila enggau nadai penekul.
Rambau PRU13 tu tadi, Wan Junaidi mujur ngetanka penuduk nya enggau majoriti 20,936 undi ngalahka chalun PKR Zulrusdi Mohd Hol, chalun Ngatika Diri Affandi Jeman enggau chalun STAR, Mura Kadir.