Jalai Projek Jiwa Murni deka ditukar ngagai standard PWD R1 Tetiap jalai ari baruh projek nya ti udah apus setaun meseti ditukar ngagai standard ke udah ditetapka perintah nengeri
BELAGA: Kepala Menteri Datuk Patinggi Abang Johari Tun Openg madah nangkan tu ila, semua projek ngaga jalai ari baruh Projek Jiwa Murni, enda tau enda di tukar ngagai standard jalai PWD R1 nyema udah apus setaun.
“Semua projek ngaga jalai Jiwa Murni, nyema udah apus setaun enda tau enda ditukar ngagai standard jalai PWD R1, ke nyadi sebengkah ari polisi perintah nengeri.
“Sebarang projek jalai ke deka digaga enda tau enda nanya penemu perintah nengeri dulu,” ku Abang Johari.
Iya madah munyi nya lebuh ngelawa sitak Belaga ba atur pengawa beserimbai enggau Hari Krismas ti digaga komuniti Orang Ulu, kemari.
Ba atur pengawa nya mega, Kepala Menteri meri pemendar ungkup RM50 juta tekala nya kena ngaga projek ba renggat keterubah, ngemanahka agi Jalai Belaga-Men- jawah.
Penyampau ungkus ke bendar ke dipadah ulih Opis Kereja Raya (JKR) manggai urung RM86 juta kena ngaga pemesai jalai 38-kilometer, ke digaga ulih sedadu nengah Program Jiwa Murni dalam taun 2014 suba.
“Laluh RM36 juta urung penyampau ungkus nya, deka diberi nengah tinda sistematik sereta dalam timpuh ke panjai, kena ngemanahka penyambung jalai di sitak tu,” ku iya ke beterima kasih ngagai komuniti di sitak nya ke udah nyambut iya enggau manah ari mula iya dichiri nyadi Kepala Menteri.
Abang Johari ti mega nyadi Menteri Wang enggau Perambu Ekonomi madahka penemuai iya ngagai sitak nya, laban deka meda kediri empu penanggul ke ditapi dalam pekara arus penyambung di sitak nya lalu beratika bakani penanggul nya ulih diputarka dalam timpuh ke panjai.
“Aku nemu pasal penanggul penyambung ke ditapi kita ditu,” ku iya lalu nandu baru madahka Pelilih Menua Belaga begunaka perambu pemansang ke sistematik kena ngemutarka penanggul di sitak nya.
Ba lansa bukai, pekara bekait enggau piak ti ngintu pegung ke digaga di tekad ai hidro, iya madah, undangundang bekait enggau pekara tu deka dibantaika di Aum Kunsil Nengeri taun baru tu ila.
“Undang- undang bekait enggau pengibun pegung ti digaga mensia, undang-undang nya deka dibai ngagai aum Kunsil Nengeri dulu (taun baru tu ila), muka jalai ke pemansang ke sistematik agi, ngambika tasik tu sama tau nyadi aset pengawa dagang temuai.
“Sarawak bisi kuasa penuh ba ke semua tekad ai di menua tu, nyengkaum di Bakun, ke diambi pulai baru ari Perintah Besai pun taun tu tadi, perintah nengeri ulih nyaga tasik tu sereta beratus pulau bukai ke bisi awak nyadi pematak temuai ngagai endur nya,” ku iya.
Ba atur pengawa nya mega, Abang Johari ti mega nyadi Menteri Pemansang Mengeri enggau Rampa Menua diberi penerang bekait enggau gaya jalai di Jalai Belaga- Menjawah, nyengkaum nerang ngagai Kepala Menteri, ni sentang jalai ( sepemanjai Jalai Belaga-Menjawah) nya ke udah digaga manah pengudah jalai nya napi penanggul laban kena ampuh bah sereta tanah tusur, ulih pegawai ari JKR.
Sama bisi enggau ngulu atur pengawa nya kemari, Pemangku Sekretari perintah nengeri, Kaban Kunsil Nengeri ( ADUN) Belaga, Liwan Lagang, Datu Jaul Samion, Sekretari Mendam ari Opis Menteri Infrastruktur, Datu Safri Zainuddin enggau Direktor Unit Perambu Menua, Datu Abu Bakar Marzuki.
Semua projek ngaga jalai Jiwa Murni, nyema udah apus setaun enda tau enda ditukar ngagai standard jalai PWD R1, ke nyadi sebengkah ari polisi perintah nengeri. Datuk Patinggi Abang Johari Tun Openg Kepala Menteri